Бүгүн, кулун тутар 11 күнүгэр, С.Н. Донской-II аатынан Үөрэҕи сайыннарар уонна идэ таһымын үрдэтэр институкка V төгүлүн ыытыллар «Төрөөбүт тыл уонна литэрэтиирэ бастыҥ учуутала» өрөспүүбүлүкэтээҕи күрэс үөрүүлээх аһыллыыта буолла.
Күрэс сүрүн сыала — учуутал айар дьоҕурун, идэтигэр маастарыстыбатын уонна төрөөбүт тылы, култуураны тарҕатар кыаҕын көрдөрүү.
Тэрээһин СӨ үөрэҕириитин туйгуна Любовь Афанасьевна Каратаева алгыһын сиэриттэн-туомуттан саҕаланна. Салгыы күрэс дьоро киэһэтин Амма улууһун Бөтүҥ орто оскуолатын учуутала, «Илин эҥэр уокурук бастыҥ эдэр учуутала» күрэс муҥутуур кыайыылааҕа Егор Никифоров киэргэттэ.
Күрэс кыттыылаахтара, бастыҥ учууталлар:
- Валентина Игнатьевна Стручкова, Хатыстыыр орто оскуолатын эбээн тылын уонна литэрэтиирэтин учуутала;
- Залина Петровна Сивцева, Амма орто оскуолатын саха тылын судаарыстыбаннай тыл быһыытынан үөрэтэр учуутала;
- Инга Саввична Константинова, С.П. Данилов аатынан Бэрдьигэстээх орто оскуолатын алын сүһүөх кылааһын учуутала;
- Матрена Егоровна Анисимова, Мастаах орто оскуолатын саха тылын, литэрэтиирэтин уонна төрүт култууратын учуутала;
- Надежда Владимировна Иванова, Чыамайыкы орто оскуолатын саха тылын уонна литэрэтиирэтин учуутала;
- Сандаара Калистратовна Еремеева, Нам 2№-дээх орто оскуолатын саха тылын уонна литэрэтиирэтин учуутала;
- Надежда Максимовна Очирова, «Арктика» оскуола-интэринээт эбээн тылын уонна литэрэтиирэтин учуутала;
- Алена Климовна Николаева, Токко орто оскуола-интэринээтин саха тылын уонна литэрэтиирэтин учуутала;
- Ульяна Афанасьевна Хоютанова, Чымынаайы орто оскуолатын саха тылын уонна литэрэтиирэтин учуутала;
- Валентина Иннокентьевна Тищенко, Лөгөй лиссиэй-интэринээтин саха тылын уонна литэрэтиирэтин учуутала;
- Андрей Андреевич Федосеев, Усуйаана орто оскуолатын саха тылын, литэрэтиирэтин уонна ОБЗР учуутала;
- Елена Егоровна Попова, Төлөй орто оскуолатын саха тылын уонна литэрэтиирэтин учуутал;
- Зинаида Евсеевна Софронова, Дьокуускай куорат 39№-дээх орто оскуолатын саха тылын уонна литэрэтиирэтин учуутала.
Үөрэҕи сайыннарар уонна идэ таһымын үрдэтэр институт директорын эбээһинэһин толорооччу Юрий Егорович Шишигин учууталларга алгыс тылын эттэ:
Бука барыгытын үбүлүөйдээх V төгүлүн тэриллэр төрүт тыл уонна литература бастыҥ учууталын быһаарар күрэспит саҕаламмытынан институт уонна тус бэйэм ааппыттан эҕэрдэлиибин! Кэлэр кэскили, кэнчээри ыччаты ийэ тылыгар уһуйар учууталлар киэҥ түһүлгэлэрэ тэриллэн, бастыҥтан бастыҥы быһаарар күннэр үүннүлэр. Туох бэлэмнээххитин, дьоҕурдааххытын, талааннааххытын ситэ арыйан, дьүүллүүр сүбэҕэ көрдөрөн, биһиги өрөспүүбүлүкэбитин Арассыыйа таһымыгар көмүскүүр күрэскэ кытта сылдьаргытыттан үөрэбит. Эһиги, учууталлар, өрөспүүбүлүкэ киэн туттар дьоно буолаҕыт. Быйылгы күрэскэ эбээн, эбэҥки, саха тылын учууталлара бааллара биһигини долгутар, үөрдэр уонна күрэспит таһымын үрдэтэр, ол эрэн гербэбитигэр баар 7 норуоппут төрүт тылларын үөрэтэр учууталлар бары мусталлара буоллар диэн баҕа санаалаахпыт, оннук буолуо диэн эрэнэбит. Баар 35 муниципальнай тэриллииттэн эмиэ бары тоҕуоруһа мустан кытталлара буоллар диэн баҕарабыт.
Күрэс кыттааччыта, Дьокуускай куорат Н.И. Шарин аатынан 39№-дээх орто оскуолатын саха тылын уонна литэрэтиирэтин учуутала Зинаида Евсеевна Софронова күрэс уонна бэйэтин бэлэмин туһунан үллэстэр:
Бу ыытыллар идэлээх күрэххэ мин үһүс кыттыым буолар. Бастатан туран, күрэскэ кыттыы диэн бэйэтэ элбэҕи ситиһии уонна сайдыы. Тоҕо диэтэххэ, киһи бэлэмнэнэн даҕаны олус элбэҕи билэр, сайдар, онон манна кытта сылдьарбыттан олус үөрэбин. Саҥа дьону, саҥа ньымалары, саҥа үөрэҕи билэрбиттэн үөрэбин, билигин миэхэ барыта — саҥа. Киһи хаһан баҕарар олорорун тухары үөрэнэр, барытын билэр киһи диэн суох, онон миэхэ бу олус үөрүүлээх түгэн. Бүгүн мин методическай маастарыстыба диэн хайысхаҕа маастар кылааһын ыыттым, онтон сарсын уруок уонна кылаас чааһын ыытабын. Күүскэ долгуйа уонна бэлэмнэнэ сылдьабыт.
Быйылгы күрэскэ дьүүллүүр сүбэ чилиэттэринэн буоллулар:
- Нюргуна Афанасьевна Соколова, СӨ Үөрэҕириитин уонна билимин миниистирэ
- Янина Станиславовна Щепанская, СӨ норуот үөрэҕириитин уонна билимин үлэһиттэрин профсойууһун рескомун бэрэссэдээтэлэ
- Нюргун Михайлович Павлов, СӨ Үөрэҕириитин уонна билимин миниистирин солбуйааччы
- Галина Ивановна Алексеева, ҮСуоИТҮҮ научнай салайааччыта
- Ольга Иннокентьевна Михалева, ҮСуоИТҮҮ УМО дириэктэри солбуйааччы
- Вера Аркадьевна Тимофеева, ҮСуоИТҮҮ УМО салайааччыта
- Николай Иннокентьевич Бугаев, ҮСуоИТҮҮ үөрэх политикатын киинин дассыана
- Любовь Николаевна Андросова, ҮСуоИТҮҮ гуманитарнай үөрэхтээһин кафедратын сэбиэдиссэйэ уо.д.а.
Төрөөбүт тылбыт — биһиги сүдү баайбыт, норуоппут кута-сүрэ. Бу баайы харыстыыр, кэлэр көлүөнэҕэ сөбүлэтэн үөрэтэр диэн сүдү эппиэтинэс. Ыччаты төрөөбүт тылынан иитэр, бар дьон өйүн-санаатын түмүүгэ суолталаах дьыаланы өйүүр дьонунан учууталлар буолаллар.
Эһиги — тыл сырдык кыһатын уматар дьоҥҥут. Күрэс эһиги идэҕитигэр тапталгытын, маастарыстыбаҕытын өссө төгүл таһымнаахтык көрдөрөр түһүлгэҕит буоллун!