Билинни үйэҕэ тылы-өһү ыытардааҕар ордук Интернеккэ, сонуну тарҕатар саайтарга, социальнай ситимнэргэ, бассаабка киһини холуннарыы, үөҕүү, түһэрии наһаа дэлэйдэ. Маныаха сиэртибэҕэ куһаҕан тыл, хара санаа хайдах курдук ыар баттык буоларын ким да улахаҥҥа уурбат. Онтон ыыстааччыга, тылбай-өспөй буолааччыга мөкү быһыы туох содуллааҕын элбэх киһи билбэт. Билигин бу кыһалҕаны Аан дойдуга үөрэтэн эрэллэр.
Социалингвистика кэнники кэмҥэ Интернеккэ киһи киһини сиэрэ суох холуннарыытыгар болҕомтотун уурар. Оҕо билимин академиятыгар буола турар норуоттар икки ардыларынааҕы чинчийэр оскуолаҕа «Кибертравля: причины, формы и средства» диэн биир бырайыак улахан болҕомтону тарта. Тьютор Ольга Филиппова кэпсииринэн, интернет нөҥүө дьону үөҕүү, сэнээһин, ыыстааһын кибертравля диэн ааттанар.
— Биһиги маҥнай социологическай ыйытык (опрос) ыытабыт. Оҕолору кытта кибертравля көрүҥнэрин быһаарабыт. Үөҕүллээччи сүрэҕэр чугастык ылынан, бэйэтин сөбүлээбэт, онон сиэттэрэн атын дьону эмиэ абааһы көрөр буолуон сөп, — диир кини.
Үгүстэр Ykt.ru порталга дьону форумнарга, комментарийдарга үөҕүүлэрэ сокуонунан уодьугуннаммат дии саныыллар. Үөҕүллээччи эбэтэр кини чугас дьоно сиэрэ суох суруйуулары Ykt.ru ситим-администраторыгар үҥсүү суруйан соттороллор. Үгүстэр онон эрэ муҥурданаллар. Ольга Филиппова этэринэн, сокуон быһыытынан киһи киһини дьон ортотугар да, киэҥ араҥаҕа да үөҕэр бырааба суох. Сиэртибэ холуобунай кодекс 282-с ыстатыйатынан суукка биэриэн сөп. Oнтон үөҕээччини IP-аадырыһынан булар кэбэҕэс.
Бу бырайыак оҕолору толкуйдатар, элбэххэ үөрэтэр. Манна кинилэр биир үксүн сиэртибэ буолбут киһи улахан охсууттан хайдах өрүттүөн сөбүн ырытыахтара.
Ааптар: Валерия Семенова, Үөһээ Бүлүү улууһун Кэнтик орто оскуолатын үөрэнээччитэ, ЯМИШ-2019 эдкора.