Биир дойдулаахпыт РФ, СӨ култууратын үтүөлээх үлэһитэ Алексей Прокопьевич Павлов салайааччылаах «Үүнэр көлүөнэ тыйаатыра» үс Сэбиэскэй сойуус Дьоруойдаах Бүлүүбүтүгэр ыалдьыттыы кэлэрин истэммит кылыыhынан көрө барарга былааннаммыппыт. Тыйаатыр биир дойдулаахпыт Валентина Якимец туруоруутугар, Мария Иванова сценографиятыгар уонна көстүүмнэригэр, Любовь Васильева «Улуу Кыайыы хотойдоро» испэктээкили көрдөрдө.
Испэктээкилгэ тус бэйэм саамай сөбүлээбитим араас кэми холбуу тутан көрдөрбүттэрэ: сэрии кэмин, ыарахан түгэннэрин, Кыайыы, эйэлээх олох, кэнчээри ыччаттар олохторун көрдөрдүлэр. Артыыстар олус итэҕэтиилээхтик оонньууллара киhини сөхтөрөр. Бары наһаа үчүгэйдик ыллыыллара, испэктээкили киэргэттэ, ситэрэн биэрдэ. Биhиги хаhан да умнуо суохтаахпыт элбэх сүтүктээх ол ыар сэрии сылларын. Испэктээк көрө олорон, киһиэхэ элбэҕи толкуйдатар, долгутар. Биир дойдулаахтарбытынан, үс улуу дьоруойдарбытынан киэн туттабыт уонна кинилэр ааттара умнуллуо суоҕа. Бу оҕолорго, эдэр ыччакка Үүнэр көлүөнэ тыйаатырын артыыстара туруорбут испэктээкили олус судургутук, өйдөнүмтүө, аныгылыы ньыманы туттан көрдөрдүлэр.
Испэктээкили көрөн баран, Бүлүү үс Дьоруойдарын олохторун, ону тэҥэ бэйэбит эhэлэрбит тустарынан өссө да элбэҕи билиэхпитин-көрүөхпүтүн баҕардыбыт.
Адриана ПАВЛОВА, Демид ТОМСКИЙ, VII «Б» кылаас,
Г.И. Чиряев аатынан Бүлүү 1 №-дээх оскуолата