Билиҥҥи үйэҕэ сахалыы тыыннаах, өбүгэлэрбит хаалларбыт айылҕаҕа сүгүрүйэр билиилэрин кэпсиир остуоруйа биһиэхэ сэдэх көстүү буолар. Бүгүн эһиэхэ бэйэм ааҕан сэҥээрбит, кэрэхсээбит кинигэм туһунан сырдатыахпын баҕардым. Айымньы сүрдээх сырдык ис хоһоонноох иитэр-үөрэтэр уратылаах.
Ол курдук, остуоруйа оҕолор сиргэ-уокка айылҕаҕа сиэрдээхтик сылдьарга, төрөппүттэри ытыктыырга, үлэни сыаналыырга ыҥырар. Маны таһынан оҕолор бу кинигэни ааҕан Айыы үөрэҕин сүрүн көстүүлэрин билэн иҥэриниэх тустаахтар. Бу кинигэм аата «Таас тиит», ааптара Владимир Семёнович Егоров, мин биир дойдулааҕым, Ньурба оройуонун Чуукаар нэһилиэгин бочуоттаах олохтооҕо.
Владимир Семёновичтыын сиһилии сэһэргэһэргэ сананным:
— Үтүө күнүнэн, Владимир Семёнович.
— Үтүө күнүнэн.
— Туох санааттан бу курдук ис хоһоонноох остуоруйа суруйарга саннаммыккыный?
— Билигин сахалыы сиэргэ-туомҥа, үгэстэргэ үөрэтэр айымньылар аҕыйахтар диэн доҕотторбун кытары бэлиэтии көрөн биир санааны ылынан остуоруйа суруйуохха диэн сүбэлэспиппит. Доҕотторум суруйан истэҕим аайы эбэн-сабан, эбии өйүк уган биэрэллэр этэ. Ол курдук бу остуоруйаны суруйарбар миэхэ бииргэ үөрэммит табаарыстарым көмө буолбуттара.
— Кинигэҕин оскуолаларга, уһуйааннарга сөбүлээн тутталлар эбит. Тоҕо бу остуоруйаны Айыы үөрэҕэр үөрэтэр дииллэрий?
— Остуоруйаҕа сахалар сүрүннээн туохха итэҕэйэллэрэ, айылҕаны кытары алтыһыылара көстөр. Айыылар, иччилэр киһи, ыал олоҕор туох оруолу оонньуулара, сиэри-туому тутуһуу туһунан суруллар. Холобура, Аан Алахчын хотун алаһа дьиэни, хас биирдии ыал иһигэр бэйэ бэйэҕэ сыһыаны араҥаччылыыр, харыстыыр аналлааҕа көстөр.
— Түмүккэ бар дьоҥҥор тугу баҕарыаҥ этэй, Владимир Семёнович?
— Суруйбут остуоруйам оҕолорго, ыччакка холобур буолан, өссө да элбэх бу курдук сахалыы иитэр айымньылар тахса туруохтарын баҕарабын.
Саха сахатынан кэрэ, бэйэбит тылбытын сүтэрбэт туһугар оҕолорбутун сахалыы иитиэххэйиҥ диэн ыҥырабын.
Дария Данилова, Чуукаар орто оскуолатын 11 кылааһын үөрэнээччитэ, Ньурба.
Кэскил14.ру