Олунньу 25 күнүгэр 2 Малдьаҕар нэһилиэгэр «Аан-Аартык» култуура киинигэр Саха өрөспүүбүлүкэтин үпкэ миниистирин солбуйааччы Алексеева Анна Степановна салайааччылаах Бырабыыталыстыба чилиэннэрин отчуоттуур мунньаҕа ыытылынна.
Бу отчуоттуур хамыыһыйа мунньаҕын иннинэ нэһилиэк баһылыга анал байыаннай дьайыыга кытта сылдьар уолаттарбытыгар гуманитарнай көмөнү оҥорбутун отчуоттаата, баһылык санаатын, кэпсээнин, биир дойдулаахтарбыт тустарынан сонуну иһиттибит.
Бырабыыталыстыба отчуотугар олохтоохторго маҥнай Саха сирин сайдыытын, ситиһиитин, 2025 сыллаах үлэ түмүгүнэн видео көрдөрдүлэр.
Мунньахха олохтоохтор олус көхтөөхтүк кытыннылар. Араас тиэмэҕэ сытыытык турар боппуруостарын биэрдилэр, бу этиллибит ыйытыылар быһаарыллыахтара диэн эрэнэ күүтэллэр. Сүрүннээн сыана үрдээһинин ыйыттылар, улахан ыйааһыннаах массыыналар сааскы ириэрии кэмигэр сүүрэннэр, суол-иис алдьаныыта чаастатык тахсарын, уот-гаас, уматык, килиэп сыаната үрдүү турарыттан дьон долгуйарын иһиттибит. Биирдиилээн дьон эмиэ тус кыһалҕаларын ыйыталастылар. Бырабыыталыстыба хамыыһыйата хас биирдии ыйытыыны мунньах боротокуолугар киллэрэн, салгыы үлэлэһэргэ эрэннэрбититтэн олохтоохтор санаалара көтөҕүлүннэ.
Текст: Ренат Терентьев, оператор, фотограф: Влад Громов, М.Е. Васильева аатынан 2 Малдьаҕар орто оскуолатын 7 кылааһын үөрэнээччилэрэ, «УОТ» медиакиин