Уус Алдан улууһун Бороҕон нэһилиэгэр Тумул бөһүөлэгэр олунньу 20 күнүгэр «Түмсүү» норуот айымньытын киинигэр «Хотугу сулус — 2026» XXIX-с төгүлүн ыытыллар Өрөспүүбүлүкэтээҕи оҕо телевизионнай конкурсун зональнай көрүү саҕаланна. Куонкурус Арассыыйаҕа Норуоттар сомоҕолоһууларын, Саха Өрөспүүбүлүкэтигэр Култуура сылыгар ананна.
Тэрээһин икки күн устата ыытыллар. Дьүүллүүр сүбэ бэрэссэдээтэлинэн XXIX төгүлүн ыытыллар «Полярная звезда» конкурс продюсера, СӨ култууратын туйгуна, «ЮНЕСКО» ситимин чилиэнэ Надежда Анатольевна Константинова, чилиэннэринэн Уус Алдан улууһун култуураҕа управлениетын начальнигын солбуйааччыта Сулустан Анатольевич Сыроватскай, Уус Алдан улууһун култууратыгар кылаатын иһин бэлиэ хаһаайына Елена Петровна Заровняева, Байаҕантай нэһилиэгин В.Д. Лонгинов аатынан Тандатааҕы норуот айымньытын киинин дириэктэрэ Альберт Алексеевич Находкин үлэлииллэр.
Күрэх 2 туурга арахсан ыытыллар. Көрүү саамай чаҕылхай түгэнинэн бастакы нүөмэринэн тахсыбыт «Мичээр» үҥкүү кэлэктиибэ буолла. Кинилэр аныгылыы «Черлидинг» үҥкүүтүн көрөөччү дьүүлүгэр таһаардылар. Салайааччылар – Ньургуяна Алексеева, Антонина Алексеева, Прасковья Петухова.
Бу нэһилиэк култууратын эйгэтигэр улахан долгутуулаах түгэн үүннэ. Сыанаҕа эгэлгэ кэрэ нүөмэрдэри көрдөрөн, эдэр артыыстарбыт көрөөччүлэрин астыннардылар. Күрэх 1 туурун түмүктүүр чааһыгар, дьүүллүүр сүбэ чилиэннэрэ олорон, дьүүллэһии кэнниттэн кыайыылаахтары таллылар.
Бу күн Тумул уонна Баатаҕай нэһилиэктэрин айар куттаах оҕолоро бэйэлэрин талааннарын толору арыйан, үрдүк ситиһиилэннилэр.
Үһүс истиэпэннээх дипломаннар: «Эстраднай хореография» номинацияҕа 5-6 саастаах кырачааннардаах «Оһуор» үҥкүү бөлөҕө (сал. Елена Алексеева, Тумул); «Вокал» номинацияҕа 11-13 саастаах «Кэрэли» ансамбль (сал. Ирина Слепцова, Тумул) истиҥ ырыатынан дьүүллүүр сүбэ биһирэбилин ылла. «Вокал-соло» номинацияҕа саамай кыра саастаах кыттааччы 4 саастаах Дамира Слепцова уонна 6 саастаах Василина Петухова (сал. Прасковья Барашкова, Тумул) ситиһиилээхтик кытыннылар. «Үҥкүү бөлөҕө» номинацияҕа 5-6 саастаах «Мичээр» бөлөх (сал. Нюргуяна Алексеева, Тумул) ситиһиитинэн үөртэ.
Иккис истиэпэннээх дипломаннар: «Вокал» номинацияҕа Баатаҕайтан сылдьар 7 саастаах Айтал Белолюбскай (сал. Анна Готовцева) бэртээхэй куолаһынан дьон кутун тутта. Эмиэ Баатаҕайтан сылдьар Арина Готовцева ситиһиилээхтик кыттан, 2-с истиэпэннээх диплом иккис хаһаайынынан буолла. «Норуот ырыата» номинацияҕа 10 саастаах Сандаара Новоприезжая (сал. И.П. Слепцова, В.П. Петрова, Тумул) кыайыылааҕынан ааттанна.
Бастакы истиэпэннээх дипломаннар: «Хореография» номинацияҕа Тумул нэһилиэгиттэн «Мичээр» үҥкүү бөлөҕө (5-6 саас, сал. Антонина Алексеева) уонна «Хотугу дьүкээбил» үҥкүүнэн «Күндээр» ансамбль (7-10 саас, сал. Елена Иванова) кыайыы өрөгөйүн биллилэр.
Номинациялар хаһайыннара: «Музыкальнай инструменнар» номинацияҕа 12 саастаах хомусчуттар «Күрүлгэн» ансамбыл (сал. Габышева Т.Г., Софронова Р.Е.) хомус тыаһын иһитиннэрдилэр.
1, 2, 3 истиэпэннээх дипломаннар «Саха» НВК студиятыгар ыҥырылыннылар.
2-с туур лауреаттара, номинация кыайыылаахтара: «Эстраднай вокал» номинацияҕа 3-с истиэпэннээх дипломант — «Тускул» ансаамбыл, 2-с кылаас үөрэнээччилэрэ, Тумул, салайааччылар – Ирина Слепцова, Любовь Алексеева. «Эстраднай вокал» номинацияҕа 3-с истиэпэннээх дипломант — Дьулусхан Местников, Суотту, салайааччы – Елизавета Портнягина. «Норуот ырыата» номинацияҕа 2-с истиэпэннээх дипломант — «Үрүйэчээн» ансаамбыл, 10 саастаахтар, Тумул, салайааччы – Варвара Петрова. «Эстраднай вокал» номинацияҕа 2-с истиэпэннээх дипломант — Ирина Слепцова, Тумул. «Хореография» номинацияҕа дуэт үҥкүү, Тумул, салайааччы – Ирина Иванова. «Уус-уран тыл» (кэпсэтии жанра) номинацияҕа 1-кы истиэпэннээх дипломант — Наина Васильева, 14 саастаах, Тумул, салайааччы – Петрова В.П. «Хореография» номинацияҕа 1 истиэпэннээх дипломант — «Хомус» ансаамбыл, 11-13 саастаахтарга, Хомустаах, салайааччы Федора Попова. «Уус-уран тыл» (кэпсэтии жанра) номинацияҕа 1 истиэпэннээх дипломант — Виктор Поротов, 15 саастаах, 9-с кылаас, Тумул, салайааччы Ньургуйаана Федоровна Константинова.
Бу курдук Уус Алдаҥҥа «Хотугу сулус-2026» бастакы күнэ ааста.
Күндүүнэ ЕГОРОВА, VIII кылаас,
М.Н. Готовцев аатынан Танда орто оскуолата, Уус Алдан
Туйаара Мамонтова видеота, Х кылаас