Олунньу 17 күнүгэр күүтүүлээх уонна долгутуулаах күммүт, дьэ, үүннэ. Биһиги, 5 кылаас үөрэнээччилэрэ, уонна кылааспыт салайааччыта Айталина Александровна Ионова салайыытынан экотропа «Узнать. Полюбить. Сохранить» диэн бырайыак арыллыытыгар бастакы хараҥаччылара буоллубут.
Үөрүүлээх арыллыыга Бүлүүтээҕи айылҕа харыстабылын инспекциятын салайааччыта Алексей Иванович Евсеев, АО «РИК АВТОДОР» дириэктэрэ Прокопий Владимирович Протопопов уонна ыҥырыылаах ыалдьыттар кэлэн кыттыыны ылбыттара. Айталина Александровна бырайыагын туһунан кэлбит дьоҥҥо билиһиннэрбитэ. Онтон биһиги кылааспыт оҕолорун сыанаҕа ыныраннар экокласс аатын иҥэрдилэр. Хас биирдиибитигэр анал футболкалары уонна значоктары иилбиттэрэ. Ыалдьыттарбытыгар анаан биһиги хоһоон, ырыа бэлэхтээбиппит. Оскуола уонна экология тэрилтэлэрин салайааччылара бииргэ үлэлэһэргэ илии баттастылар. Ол үөрүүлээх түгэни Саха көрдөрөр-иһитиннэрэр национальнай хампаанньа кэрэспэдьиэнэ биһигиттэн интервью ылбыта. Ол күн НВК ханаалыгар бэйэбитин көрөн, наһаа үөрбүппүт уонна үлэлиир санаабыт өссө күүһүрдэ.
Бу бырайыак ааптара, биһиги кылааспыт салайааччыта Айталина Александровна Саха Өрөспүүбүлүкэтин «ЭкоШаг» инники көлүөнэ целевой фондатын «Эльгауголь» хампаанньа көмөтүнэн ыытыллыбыт күрэҕэр кыайан, биһиги оскуолабыт граҥҥа тиксибитэ.
Бырайыак сыалынан биһиги төрөөбүт дойдубут айылҕатын, биһиги олорор Чочубут, Кыадаҥдабыт историятын, бэлиэ сирдэрин, эриэккэс үүнээйилэрин көрө-истэ сылдьыы буолар.
«Мин айылҕа оҕотобун» диэн этиинэн салайтаран, билиҥҥи кэмҥэ саха оҕото айылҕаҕа чугаһыахтаах дии саныыбыт. Хас биирдии оҕо айылҕатын куруук харыстыахтаах, сиэри-туому тутуһа сылдьыахтаах.
Иван Михайлович Гоголев-Кындыл аатынан
Чочу орто оскуолатын 5 кылааһын үөрэнээччилэрэ