Саха сиригэр төрөөбүт тыл, сурук-бичик күнүн көрсө линейка буолла. Бу түгэн хас биирдиибитигэр улахан суолталаах. Семен Андреевич Новгородов – чулуу киһи аатынан киэн туттуу уонна төрөөбүт тылбыт симэлийбэтин туһугар эппиэтинэһи сүгэрбитин өйдүүбүт.
Ыҥырыылаах күндү ыалдьыттарбыт: Бөтүҥ нэһилиэгин тыа сирин түөлбэтин баһылыга Саргылана Борисова, Амма улууһун үөрэҕириитин иитэр үлэҕэ уонна эбии үөрэхтээһин хайысхатыгар салайааччыны солбуйааччы Акулина Иванова уонна оскуола дириэктэрэ Алексей Николаевич эҕэрдэ тылларын, баҕа санааларын эттилэр. Кэлбит күндү дьоммут саха тылын сайдыытын, сурук-бичик устуоруйатын, бүгүҥҥү күҥҥэ суолтатын туһунан иһирэхтик кэпсээтилэр. Ордук иэйиилээх түгэнинэн, Саха сиригэр Култуура сылын көрсө «Оллоон» үрдүк көрдөрүүлээх фольклорнай ансаамбыл төрүттэммитэ 30 сылын бэлиэтээһин буолла. Биһиги олохтоохтор киэн туттар, олоҥхону өрө туппут бөлөхпүт саха норуотун фольклорун, ырыатын-тойугун чөл хаалларан, аныгы көлүөнэҕэ илдьэ сылдьар. Ансаамбыл аата өрөспүүбүлүкэ таһымыгар биллэр, кинилэр кыайыылара-хотуулара элбэх. Оһуохай тэтимэ, дорҕооно барыбытын биир тыыннаата, биир санааҕа тиэриэртэ, ис сүрэхпитин долгутта.
СӨ култууратын, үөрэҕириитин туйгуна, Софья Сидорова аатынан бэлиэ хаһаайына, “Амма киэн туттуута”, СӨ норуотун уус-уран айымньытын сайдыытыгар тус кылаатын иһин бочуоттаах бэлиэлэр хаһаайыннара, Бөтүҥ нэһилиэгин бочуоттаах олохтооҕо “Оллоон” оҕо көрдөрүүлээх фольклорнай ансаамбыл сатабыллаах салайааччытынан өр сылларга үлэлээбит Анисия Даниловна Софронова үтүө аатын ытыктаан, ахтан-санаан аастыбыт. Бу дьыл олунньу 15 күнүгэр кини төрөөбүтэ 80 сылын көрсө Култуура сылын астыбыт. Анисия Даниловна фольклорнай хамсааһын төрүттээччитэ, элбэх талааннаах ыччаты иитэн-үөрэтэн таһаарбыта. Кини өйө-санаата, үлэтигэр уонна олоххо туруулаһыыта барыларыгар холобур буола турар. Бу бэлиэ күҥҥэ биһиги «Оллоон» ансаамбылы эҕэрдэлээтибит уонна бары бииргэ төгүрүктүү туран оһуохайдаатыбыт. Оһуохайы ансаамбыл ситиһиилээх иитиллээччитэ, уһуйуллааччыта Дарияна Яковлева этэн таһаарда.
Бу күн тигинэччи, оскуолабыт үрдүк сыанатыгар дэгиттэр салайааччы, уһулуччулаах тэрийээччи Анисия Софронова үөрэтэн-такайан таһаарбыт оҕолоро “Оллооннуу туойдахпына” диэн ааттаан олус таһаарыылаах эҕэрдэ кэнсиэрин туруордулар. Кэнсиэри “Оллоон” оҕо көрдөрүүлээх фольклорнай ансаамбыл бастакы хараҥаччыта, С.Я. Левин аатынан норуот айымньытын киинин уус-уран салайааччыта, СӨ култууратын туйгуна Саина Попова уонна Дарияна Яковлева туруордулар. Билигин даҕаны иитэн таһаарбыт уһуйааччыларын суолунан утумнаахтык дьарыктарын салҕыыллар, “Оллоон” оҕолорун үөрэтэллэр, эбии оҕолору ылаллар, ситиһиилээхтик араас күрэххэ кытталлар.
Маннык көрсүһүүлэр саха тылыгар, култууратыгар, фольклоругар уонна суругун-бичигин устуоруйатыгар болҕомтону тардаллар. Билигин даҕаны сахабыт тыла, итэҕэлэ, үгэстэрэ уһаан-тэнийэн иһэллэр. Бу – барыбытын холбуур, күүс-көмө буолар улахан суолталаах түгэн.
“Сайдам” медиа киин чилиэннэрэ Виолетта Иванова, Юрьяна Гурьева, Сайнаара Сергеева, VIII кылаас үөрэнээччилэрэ, Бөтүҥ, Амма.
keskil14.ru