Мин алын кылаастан ыла оскуолам олоҕор өрүү көхтөөхтүк кыттабын, араас күрэхтэргэ, олимпиадаларга уонна да атын тэрээһиннэргэ оскуолам чиэһин өрүү көмүскүүбүн. 7-с кылааска үөрэнэ сырыттахпына, оскуолабытыгар медиа-киин аһыллыбыта. Бастаан «Сириус» диэн ааттааҕа, кэлин «Уткин сонуннара» диэн ааттанан, билигин да үлэлии-хамсыы турар.
Манна интервью ылан хаһыат таһаарарбыт, видеоҕа уонна хаартыскаҕа түһэрээччибит. Маҥнайгы интервью ылбыт түгэммин билигин да олус үчүгэйдик өйдүүбүн, ол олус долгутуулаах уонна улахан суолталаах.
Бастаан улахан оҕолору көрөн үөрэнэрбит, бииргэ үлэлиирбит, салгыы үөрэнэн, бэйэбит үлэлиир буолбуппут. Оҕоҕо инники идэтин талааһыҥҥа олус уустуктардаах буолар. Мин араас идэни баһылыахпын баҕарарым, холобура: быраас, учуутал, археолог уонна артыыс. Журналистика идэтэ өйбөр да суоҕа. Ол курдук, 10-с кылааска үөрэнэ сылдьан журналистика идэтин сэргээн, бу идэни баһылыырга сыал-сорук туруоруммутум. Ол онтон ыла медиа-кииммэр күүстээхтик үлэлээбитим.
Куруук матырыйаалларбын «Кэскил» оҕо бэчээтин кыһатыгар ыытарым уонна киэн туттарым. Араас элбэх кэккэ ситиһиилэрдээхпин. II Өрөспүүбүлүкэтээҕи эдэр ыччат фестивалыгар «Түмэн Түгэн» диэн тэрээһиҥҥэ волонтер быһыытынан садьыктарынан көмө оҥорбутум.
Былырыын «Океан» лааҕырга эмиэ этэрээппэр пресса (информационное сопровождение) этим уонна дружинабыт телеграмм ханаалын салайан күннээҕи сонуннарбытын таһаарааччым. Оскуолам ханаалын эмиэ билигин да салайан сонуннары суруйабын.
Саамай умнуллубат түгэним — Ил Дархан Харыйатыгар Айсен Сергеевич эдэр кэрэспэдьиэннэри кытары көрсүһүүтүгэр кыттыбытым. Манна «Кэскил» оҕо бэчээтин кыһатын 6 бастыҥ эдэр кэрэспэдьиэнэ буоламмыт, бэрт сэргэхтик Ил Дархан Айсен Сергеевич Николаевы кытары көрсүбүппүт. Бу түгэн олохпор улахан бэлиэ түгэн буолбута.
Кэлин Лена Ивановнаҕа уонна Альберт Гаврильевичка тахсаммын, «Ньурба – Огни Нюрба», «Кыым» хаһыаттарга матырыйаалларбын таһаарар буолбутум.
Сыралаах үлэм сыаналанан, «Кэскил» оҕо бэчээтин кыһата уонна «Ньурба – Огни Нюрба» хаһыат «Бастыҥ эдэр кэрэспэдьиэн» аатын сүгэммин олус үөрбүтүм уонна киэн туттубутум. Бу ситиһиим миэхэ инникитин өссө дьулуурдаахтык үлэлииргэ, идэбин баһылыырбар улахан төһүү-күүс буолар.
Александр Федоров, Ньурба улууһун К.Д. Уткин аатынан Марха орто оскуолатын 11 кылааһын үөрэнээччитэ, «Уткин сонуннара» медиа-киин эдкора.
keskil14.ru