ТӨРҮТ БУОРТАН КҮҮС ЫЛАН, ҮЛЭНЭН ААТЫ КУБУЛУТУУ – ДЬИҤНЭЭХ ХОРСУН БЫҺЫЫ
Бу күннэргэ биһиги оскуолабытыгар Арассыыйа Үлэҕэ Дьоруойа Михаил Николаевич Готовцев 80 сааһыгар анаммыт быыстапка аһылынна.
Михаил Николаевич 1946 сыллаахха тохсунньу 2 күнүгэр Уус Алдан оройуонугар Танда нэһилиэгэр Ыарҕа сайылыкка төрөөбүтэ. Оҕо сааһыттан тыа сирин ыарахан үлэтигэр иитиллибитэ. Эдэр сааһыттан үлэҕэ эрэ буолбакка, успуорка эмиэ көхтөөх этэ. Сүүрүүнэн, хайыһарынан дьарыктанан, бэйэтин тулуурдаах буоларга эрчийбитэ. Успуорт нөҥүө иҥэриммит дьулуура киниэхэ кэлин тыа сирин ыарахан үлэтигэр улахан тирэх буолбута.
Михаил Николаевич үйэтин тухары сүөһүнү иитиигэ, ол иһигэр ыанньыксыт идэтигэр бэриниилээхтик үлэлээбитэ. Кини идэтигэр олус эппиэтинэстээхтик сыһыаннаһара. Үлэлээбит сылларын тухары сүөһү ахсаанын элбэтиигэ, ынах үүтүн таһымын үрдэтиигэ уһулуччу ситиһиилэммитэ. М.Н. Готовцев – Үлэҕэ Албан аат уордьан толору кавалера.
Саха сирин тыатын хаһаайыстыбатын сайдыытыгар киллэрбит кылаата үрдүктүк сыаналанан, 2014 сыллаахха Арассыыйа Президенэ Владимир Путин илиититтэн «Арассыыйа Федерациятын Үлэҕэ Дьоруойа» үрдүк ааты туппута.
Михаил Николаевич бастыҥ ыанньыксыт эрэ буолбакка, дьиҥнээх селекционер. Кини ынахтара үүт биэриитигэр өрөспүүбүлүкэҕэ эрэ буолбакка, бүтүн Арассыыйа таһымыгар рекорд олохтообуттара. Холобур, биир фуражнай ынахтара сылга 5000-6000 лиитирэ үүтү биэрэр үрдүк таһымҥа тахсыбыттара.
Быыстапка арыллыытыгар музей үлэһитэ Матрёна Петровна Черноградская аһаҕас уруок ыытта. Тэрээһин саастарынан көрөн үс бөлөҕүнэн ыытылынна: алын, ортоку уонна улахан. Оҕолор Үлэ Дьоруойун Михаил Николаевич Готовцев туһунан өссө элбэҕи биллилэр.
Салгыы бибилэтиэкэ үлэһиттэрэ Эльвира Юрьевна Егорова уонна Алёна Никитична Кардашевская ыыттыллар. Бу курдук үлэ киһитин үбүлүөйдээх тэрээһинэ барыбытын биир өйгө-санааҕа түмтэ.
Күндүүнэ ЕГОРОВА, VIII кылаас,
М.Н. Готовцев аатынан Танда орто оскуолата, Уус Алдан
Арассыыйа Үлэҕэ Дьоруойа М.Н. Готовцев «Кэскил» медиа-оскуола юнкордарын кытта көрсүһүүтэ, от ыйа, 2025 с., Төхтүр, Мэҥэ Хаҥалас: