Дойду сурахтаах, алаас ааттаах. Хас биирдии киһиэхэ биһигин ыйаабыт сирэ туохтааҕар да күндү.Бүгүн эһиэхэ төрөөбүт Дүллүкүм кэрэ-бэлиэ миэстэлэрин туһунан сэһэргиэм.
Үөһээ Бүлүү улууһугар Бүлүү Эбэ Хотун хаҥас биэрэгэр кэрэ көстүүлээх Үрүҥ Хайа баар. Ол хотугулуу-арҕаа өттүнэн 7 биэрэстэлээх сири айаннаатахха, айылҕа маанылаан айбыт ураты көстүүлээх Дүллүкү Эбэҕэ тиийэҕин. Нэһилиэкпит бу күөл аатынан Дүллүкү диэн ааттанар.
“Дүллүкү” диэн тыл эбэҥкилэр олоро сылдьыбыттарын бэлиэтигэр ааттаммыт. Ол курдук эбэҥкилии “дулу – средний, ортоку” диэн суолталаах. Чыыйык, Бүдүргэй, Дүллүкү, Кур Муустаах, Уолбут диэн күөллэр утуу-субуу сыталлар. Онно Дүллүкү Эбэ ортоку сытар.
Дэриэбинэҕэ киириигэ “Туругур, Дүллүкү!” стела олохтоохтору, ыалдьыттары эҕэрдэлии көрсөр. Стела 2022 сыллаахха “Дүллүкү нэһилиэгэ” МТ баһылыга Егор Алексеевич Николаев эскииһинэн оҥоһуллан туруоруллубута.
Нэһилиэкпитигэр оҕолор сөбүлээн сылдьар, сынньанар сирбит – Дьоҕус паарка. Манна күннэтэ оҕолор кэлэн оонньууллар, араас тренажердарга эрчиллэллэр.Былаһаакка биир ураты суолталаах көстүүтэ – Аҕа дойду Улуу сэриитигэр кыттыбыт хорсун буойуттарбытыгар аналлаах пааматынньык. Манна сыллата ытык дьоммутун чиэстиир Улуу Кыайыы парада ыытыллар.
Ырыалаах-тойуктаах норуот инники кэскиллээх, үтүөҕэ-кэрэҕэ тардыһар аналлаах. Тыл кэрэтин ууһун баһылаабыт биир дойдулаахпыт олоҥхоһут Никита Семенович Александров – Ынта Никиитэ буолар. Кини 13 тыһыынча строкалаах “Көр Буурай” кэрэхсэнэр олоҥхону бар дьонугар суруйан хаалларбыта. Хомоҕой тыллаах олоҥхоһуппут төрөөбүт алааһа биир кэрэ-бэлиэ сир буолар.Мэҥэ бэлиэ 2024 с. олохтоох эдэр поэт Николай Васильев – Харыйалаах Уола көҕүлээһининэн туруоруллубута.
Чаайа – Дүллүкү олохтоохторо сынньанар сирдэрэ. Манна оҕо аймах, улахан дьон ыраас салгынынан дуоһуйа тыына, сынньана кэлэллэр. Бэлиэ түгэни хаартыскаҕа үйэтитэн, айылҕа мааны көстүүтүн киэн тутта, сөҕө-махтайа көрүөххэ сөп.
Ыһыах — саха норуотун кэтэһиилээх бырааһынньыга. Дүллүкү нэһилиэгин үрүҥ тунах ыһыаҕын ыһар, алгыс ылар сирэ — Киэҥ Хонуу. Кэрэ көстүүлээх ыһыах сирэ олохтоох көҕүлээһиннэри өйүүр бырагыраама чэрчитинэн оҥоһуллубута.
Төрөөбүт төрүт сиргитин таптааҥ, харыстааҥ!
Сиһилии видеороликка көрүҥ:
Айыына Петрова, 9 кылаас, Сааскыйа Васильева, 10 кылаас, » Эрчим» медиакиин, Дүллүкү, Үөһээ Бүлүү.