Ахсынньы 6 күнүгэр оскуолабыт 110 сыллаах үбүлүөйүн бэлиэтээтибит. Кэлбит ыалдьыттары өйдөрүгэр-санааларыгар эрэ хаалбыт икки этээстээх мас оскуолалара арай… муус оҥоһук буолан көрүстэ, соһуччу үөрүүнү бэлэхтээтэ.
Оскуолабыт аҕаларын түмсүүтэ сырдык санаанан салайтаран, ааспыт кэми кэрэһэлээн, эргэ оскуолабыт дьэҥкир кэмтэн кутуллубут курдук тэбис тэҥ муус холобурун оҥорорго биир санаанан туруммуттара. Бу өйдөбүнньүк эрэ буолбакка, ааспыт кэмҥэ дириҥ ытыктабыл бэлиэтэ, кэнчээри ыччакка сырдык бэлэх.
Оскуолабыт аҕалара, эһэлэрэ оҕолоро, сиэннэрэ кинилэр хайдах, ханнык оскуолаҕа үөрэнэн, үлэһит, дьон буолбуттарын муус оҥоһук нөҥүө умсугуйан билиэхтэрин баҕарбыттара. Тоҕо диэтэххэ, оскуола кинилэр өйдөрүгэр-санааларыгар куруук баар. Оскуола түөлбэ сүрэҕэ буолан, ытык тыыннаах кэмин өйдөбүлэ: манна бастакы хоһооннор этиллибиттэрэ, ырыалар дуорайбыттара, үөрүү-көтүү аргыстаспыта, бүтэһик чуорааннар дьоро кэмнэрэ бэлиэтэммиттэрэ.
Биһиги аҕаларбыт урукку икки этээстээх оскуоланы мууһунан оҥорорго оскуолабыт выпускнигын, талааннаах маастар Егор Дмитриевич Елисеевы кытта кэпсэтэн, бу кэрэ оҥоһук айыллан таҕыста. Ол түмүгэр ытык ыалдьыттарбытын, оскуолабыт араас сыллардааҕы выпускниктарын үөртүлэр, ааспыт сыллары, оҕо саас кэрэ кэмнэрин санаттылар.
Үтүө, сырдык санаа биһиги оскуолабыт аҕаларын, эһэлэрин төрөөбүт түөлбэлэригэр, үөрэммит оскуолаларыгар тапталларын, махталларын ытык бэлиэтэ буолар.
Аристарх ЛУКИН, Х кылаас,
С.Д. Флегонтов аатынан Хадаар орто оскуолата, Чурапчы