Мин аҕам Уолбаҕа үлэни өрө туппут Торуома уус удьуордара Боппосовтартан төрүттээх. Төрдүм-ууһум туһунан үчүгэйдик билээри үөрэтэн саҕалаатым. Маҥнай “Торуомалар” диэн төрүччүбүтүн илиинэн оҥорбуппут. Билигин FamyTale диэн приложениены булан “Торуомалар” диэн төрүччүбүт маһын электроннай гына оҥордубут. Барыта 8 көлүөнэни чинчийэн биллибит.
Хос эһэм Трофим Трофимович Боппосов былыр Бүөр диэн алааска олорбут сэниэ ыалтан төрүттээх эбит. Дьоно эрдэ өлөн тулаайах хаалбыт. Кини төрдүгэр былыр Саппыкы Сэмэн диэн киһи баар эбит. Ол киһи дьон барыта сарыы этэрбэһинэн сылдьар эрдэҕинэ саппыкылааҕын иһин итинник ааттаабыттар. Быһыыта үөрэхтээх киһи буолуон сөп эбит диэн сабаҕалыыбыт. Бу Сэмэн Уолбаҕа хантан эрэ кэлбитэ үһү дииллэр. Хос эбэм Мария Ивановна бу киһи туһунан кэпсииригэр “Хайа Хаҥаластан кэлбитэ биллибэт Саппыкы Сэмэнтэн төрүттээххит дииллэр этэ”- диэбитэ үһү. Тааттаҕа биһигиттэн атын Боппосовтар суохтар. Арай Хаҥалас улууһугар биһиги курдук араспаанньалаахтар бааллара биллэр.
Торуомалар уус удьуордара хос эһэбит Трофим Трофимович Боппосовтан саҕаланар
Кини 40-тан тахса сыл устата рационализатор — уус буолан дьон биһирэбилин ылбыта. Үгүс мындыр оҥоһуга илии үлэтин чэпчэппитин туһунан элбэхтик хаһыакка суруйбуттара, хайҕаабыттара, наҕараада бөҕөтүгэр тиксибитэ. Хос эһэбит 6 уоллаа5а бары уһаналлар, онон кинилэр уус династияларын холбоотоххо 200-тэн тахса сылы хабар. Уолаттарын кытта кэлин биригээдэ буолан наар бииргэ үлэлииллэр эбит. Техника оҥороллор, дьиэ туталлар, оттууллар.
Михаил Трофимович ханна да суох ураты дьоҕурунан элбэх киһини сөхтөрбүт, сүөһү ноһуомуттан Саҥа дьыл аайы арҕааҥҥы халандаарынан саҥа сыл 12 бэлиэтин оҥорбут норуот “скульптора” буолар. Элбэх хаһыакка, сурунаалга тахсыбыта, телевизорга көстүбүтэ. 2017 сыллаахха Таатта улууһун норуотун маастара буолбута.
Кэлин тэтиҥ мас эмтээҕин билэн араас массажтыыр тэриллэри оҥорор. Таатта талаҕыттан олоппос, харысхал, оонньуур оҥорор.
Иннокентий Трофимович кыра кээмэйдээх куһаҕан суолларынан сылдьар массыыналары, мотособакалары оҥорор, хайа баҕарар тимири “хаамтарар, сүүрдэр” ураты дьоҕурдаах. Иван Трофимович хаартыскаҕа түһэриинэн дьарыктанар. Тимиринэн, маһынан уһанар. Аныгы олох сиэринэн социальнай ситимнэргэ оҥоһуктарын элбэхтик таһаарар, сүбэлэри биэрэр.
Уус эһээбит туһунан оҕолоро
2012 сыллаахха “Торуома Уус” диэн кинигэ оҥорон таһаарбыттара. Олус туһалаах кинигэни аймахтар бары уура сылдьан көрөбүт туһанабыт. Бу кинигэҕэ киирбититтэн көрдөххө хос эһэбит Трофим Трофимович туһунан араас хаһыакка тахсыбыт ыстатыйалар элбэхтэр. Бу тахсыбыт ыстатыйалартан хос эһэбит үлэни өрө туппутун туһунан этиилэри элбэҕи буллум. Бу этиилэр эһэм үлэни таптыырын, үлэһит киһи дьон ытыктабылын, үрдүк сыанабылы ыларын, байылыат олоҕу олоруон сөптөөҕүн, үлэттэн дьоллоох буоларын туһунан биллим.
Холобур:
- 12 сааһыттан кыракый уол улахан дьон улэтигэр эриллибитинэн барбыта.
- Колхоһугар хонуу төһүү үлэһитэ буолбута.
- Бу үлэлээбит сылларыгар рационализатор уус быһыытынан киэҥник билиннэ уо.д.а.
Торуомалар оҕолоро, сиэннэрэ үлэни күргүөмүнэн сылдьан оҥорорго үөрэммит буолан муус, мас, от үлэтин начаас оҥороллор. Билигин улаатан дьиэ тутуутун, өрөмүөнүн хардары — таара сылдьан көмөлүүллэр. Сиэннэр эмиэ аҕаларын кытта бары үлэҕэ тэҥҥэ сылдьаллар.
«Уолаттаргын үлэҕэ сүрэхтээх дьон гына иитэн, уһуйан Боппосовтар династияларын төруттээтиҥ. Үлэлээбитиҥ былаһын тухары эҥкилэ суох, ыраас суобаскынан улэлээн бүгүҥҥу олоҕу уһансыбыккар улахан махталы этэбит» — диэн корреспондент Елена Софронова хаһыакка суруйбут алгыһа утуму салҕааччы эдэр көлүөнэ Боппуоһаптарга – Торуомаларга кэс тыл быһыытынан бэриллэн иһэр.
Маайа Боппосова, VII «В»кылаас,
А.Е.Мординов аатынан лицей, Таатта улууһа