Хас биирдии киһи төрөөбүт дойдулаах буолар. Улааппыт, сиппит-хоппут, силис тарпыт, маҥнайгы хардыыларбытын оҥорбут, үөрбүт-көппүт, оҕо сааспытын атаарбыт сирбит, дойдубут биһиэхэ саамай күндү.
Оттон биһиги төрөөбүт-улааппыт дойдубут – Майа сэлиэнньэтэ. Ол курдук, дойдубут туһунан кэпсиэхпит, биллэр-көстөр сирдэрин кытта билиһиннэриэхпит.
Биллэрин курдук, хас биирдии нэһилиэк дьонун олоҕо-дьаһаҕа оскуоланы кытта ыкса ситимнээх буолар. Биһиги Майабытыгар 3 оскуола баар:
- Эһиги иннигитигэр саха биллиилээх учуонайа, сахаттан бастакы Россия билимнэрин Академиятын академига, техническэй билимнэр доктордара, профессор В.П. Ларионов аатынан Майа 1 нүөмэрдээх оскуолата. Быйыл оскуолабыт 115 сааһын бэлиэтир үбүлүөйдээх сыла.
- Салгыы Саха Өрөспүүбүлүкэтин биллиилээх түмэт уонна бэлиитикэ диэйэтэлэ Филипп Гаврильевич Охлопков аатынан Майа 2 нүөмэрдээх оскуолата.
- Майатааҕы лицей. Лицей РСФСР-с тыа хаһаайыстыбатын үтүөлээх үлэһитин, Саха Республикатын норуот хаһаайыстыбатын үтүөлээх үлэһитэ Иван Гафрильевич Тимофеев аатын сүгэр.
Биһиэхэ өссө баар – Дмитрий Федорович Ходулов аатынан норуот айымньытын дьиэтэ. Манна нэһилиэкпит, улууспут улахан тэрээһиннэрэ буолаллар. Иһигэр “Кыталык” кафелаах, манна дьон-сэргэ бырааһынньыктарын, үөрүүлээх түгэннэрин бэлиэтиэхтэрин сөп. Маны таһынан “Манчаары” киинэ саалата баар.
Роман Гаврильевич Васильев аатынан Мэҥэ Хаҥаластааҕы кыраайы үөрэтэр олус интэриэһинэй түмэллээхпит.
Майабытыгар икки балыыһа баар: Мэҥэ Хаҥаластааҕы районнай поликлиника уонна оҕолор көрдөрөр поликлиникалара. Бу поликлиника норуокка Санта Барбара диэн биллэр.
Нэһилиэкпитигэр дьон-сэргэ, оҕо-уруу сынньанар, күүлэйдиир, спордунан дьарыктанар сирдэрэ сылтан сыл аайы элбээн иһэллэр.
Дьэ, уонна Майабыт сэлиэнньэтин тэбэр сүрэҕэ — «Майа сайына» диэн Комсомольскай болуоссат. Манна баар араас оонньуур, спортивнай площадкалар, велосипедынан сылдьар дорожка уонна сылаас да сылаас чэйдээх, минньигэс да минньигэс астаах дьон сөбүлээн сылдьар кафета. Киэһэ хараҥардаҕына, араас уоттар тыктахтарына, «Майабыт сайына» өссө кэрэ көстүүлэнэр!
Ахсынньы 1 күнүгэр «Зима начинается с Якутии» бэстибээл чэрчитинэн болуоссаппытыгар саҥа дьыллааҕы харыйабыт сандаарыйа тыкта, дьоҥҥо-сэргэҕэ үөрүүнү-көтүүнү, бырааһынньыктааҕы настарыанньаны бэлэхтээтэ.
Дьэ, бу курдук эҺиги Майабыт араас интэриэһинэй, кэрэ, биллэр-көстөр сирдэрин кытары билиһиннэрдибит. Биһиги төрөөбүт дойдубутун Майаны олус таптыыбыт, манна олорорбутунан киэн туттабыт. Биһиги төрөөбүт нэһилиэкпититтэн дойдубут саҕаланар!
Уһулла, суруйда, кэпсээтэ: Нюргуяна Васильева,
Мичилиинэ Захарова, 10 кылаас үөрэнээччилэрэ
Монтаж: Нюргуяна Васильева,
В.П. Ларионов аатынан Майа орто оскуолата, Мэҥэ Хаҥалас