“Если я гореть не буду,
Если ты гореть не будешь,
Если мы гореть не будем,
Кто тогда развеет тьму!”
Төрөөбүт дойдуга таптал, төрөөбүт дойдуга бэриниилээх буолуу хас биирдии киһи ытык иэһэ буолар. Бүлүү улууһун Чинэкэ нэһилиэгин С.М. Васильев аатынан Чернышевскай орто уопсай үөрэхтээһин оскуолатыгар «Пламя» байыаннай-патриотическай кулууп тэриллибитэ быйыл 25 сыла. Кулууп 2000 сылтан үлэлиир, оҕолору РФ үөрэҕириитин эйгэтин бочуоттаах үлэһитэ, Саха сирин үөрэҕириитин туйгуна, ОБЗР учуутала Владимир Владимирович Протопопов дьарыктыыр. Бу сыллар тухары үгүс оҕо «Пламя» кулуупка иитиллэн, инники олоххо бигэ тирэхтээх киэҥ аартыкка үктэннэҕэ. Манна VI-XI кылаас оҕолоро дьарыктаналлар. Онтон саамай бастыҥнара хамаандаҕа киирэн, араас байыаннай-спортивнай күрэхтэргэ кытталлар. «Пламя» хамаанда «Снежный барс» күрэхтэһиигэ Бүлүү улууһугар хас да төгүл чемпион үрдүк аатын сүгэн, өрөспүүбүлүкэҕэ ситиһиилээхтик кыттан, араас сылларга бүтүн Арассыыйатааҕы «Победа» байыаннай-патриотическай оонньууларга өрөспүүбүлүкэбит аатын Новороссийскай, Рязань, Казань, Севастополь куораттарга көмүскээн кэлбитэ.
Дьарыктанааччылар кэпсииллэр
Айаана Семенова, IX кылаас:
—Мин «Пламя» хамаандаҕа 2025 с. олунньу 25 күнүттэн дьарыктанабын. Салайааччыбыт Владимир Владимирович Протопопов. «Пламяҕа» киириэхпиттэн кини элбэххэ үөрэттэ. Автомат АК 74 хайдах хомулларын, ыһылларын биллим, маҕаһыын хомуйарга, одиночнайга тахсан хаамарга, воздушканан ытарга үөрэнним. Күрэхтэһиилэргэ дьүүллүүр сүбэ хамаандаттан икки талбыт оҕолорун одиночнайга таһааралларыгар ааккын ааттыыллара олус долгутуулаах түгэн буолааччы. Хас да күрэхтэһиигэ кытынным. Бастакы күрэҕим кулун тутар 1 күнүгэр Өкүндүгэ ааспыта. Онно II миэстэ буолбуппут. Иккиһим кулун тутар 13 күнүгэр буолбута. Онно зачекка киирбэккэ кыттыбыппыт. Үсүһүм алтынньы 9 күнүгэр, Бүлүү куоратыгар буолбута, онно II миэстэ буолбуппут. Онтон ахсынньыга биһиги хамаандабыт 25 сылыгар ананаллаах улуустааҕы «Снежный барс-2025» күрэхтэһии буолуохтаах, онно кыттабын, бэлэмнэнэ сылдьабыт.
Радик Потапов, VIII кылаас үөрэнээччитэ:
— «Пламя» хамаандаҕа былырыыҥҥыттан сылдьабын. Хамандыырбыт Айаан Черкашин оскуоланы бүтэрэн, Красноярскай куоракка летнай училищеҕа киирбитэ. Билигин хамандыырбыт IX кылаас үөрэнээччитэ Богдан Нифонов буолла. Улааттахпына, мин эмиэ хамандыыр буолуом. Хамаандаҕа киирэрбэр бастаан ыарырҕаппытым, онтон сөбүлээтим. Ордук ботуруон хомуйааһынын ыарырҕатабын. Саамай сөбүлүүрүм аптамаат ыһааһына-хомуйааһына. Мин санаабар, уол барыта манныгы сатыахтаах. Бары кыһаллан дьарыктанабыт. Учууталбыт Владимир Владимирович үчүгэйдик дьарыктыыр, ирдэбиллээх.
Богдан Нифонов, «Пламя» БПК хамандыыра, IX кылаас үөрэнээччитэ:
—Мин хамаандаҕа VI кылааска киирбитим. Элбэҕи биллим, үгүһү сатаатым: аптамааты, маҕаһыыны ыһар-хомуйар, ОЗКА кэтэр буоллум, кэккэлии хаамыы бэрээдэгин сатаатым. Быйыл хамандыыр эппиэтинэһин сүктүм. Тус бэйэм кыайыыларым диэн, өрөспүүбүлүкэҕэ аптамаат маҕаһыынын ыһыыга-хомуйууга I миэстэ буолбутум уонна улууска аптамаат уонна маҕаһыын ыһыытыгар-хомуйуутугар призербун уонна чемпиоммун. Чурапчыга, Дьокуускайга араас күрэхтэһиилэргэ кыттыбытым. Мин санаабар, уол оҕоҕо олус туһалаах кулууп. Оскуолабын бүтэрдэхпинэ, баҕар, байыаннай идэни талыам.
Ити курдук «Пламя» БПК иитиллээччилэрэ бэйэлэрин санааларын кэпсээтилэр. Доҕотторбутун, учууталбытын В.В.Протопоповы «Пламя» хамаанда быйылгы 25 сыллаах үбүлүөйүнэн эҕэрдэлиибит, үрдүк ситиһиилэри баҕарабыт.
Нария Веревкина, IX кылаас үөрэнээччитэ,
«Чинэкэ Кэскилэ» медиа-киин, Бүлүү улууһа.