Дьокуускай куоракка ыытыллыбыт Хотугу норуоттар төрүччүлэрин форумугар кыттыыны ылбытым. «История дьиэттэн саҕаланар» диэн түһүлгэҕэ олоҥхоһут эһэм Егор Родионович Лазарев туһунан чинчийбит үлэбин кэпсээбитим.
Форумҥа кыттар кэммэр миэхэ олус долгутуулаах түгэн буолан ааспыта. Ол курдук Арассыыйа араадьыйатын Саха сиринээҕи биэриитигэр быһа эфиргэ кыттыыны ылбытым. Мин эһэм 80-с сылларга куоракка баран араадьыйаҕа уһуллубут этэ. Билигин онно уһуллубут ырыатын, тойугун, олоҥхотун истэммин, чинчийэр үлэбэр туһанабын. Элбэх сыллар ааспыттарын кэнниттэн аны мин, сиэнэ, араадьыйаҕа тиийэммин олоҥхоһут эһэм Егор Родионович Лазарев туһунан киэн тутта кэпсээтим. Бу миэхэ уонна мин аймахтарбар олус долгутуулаах этэ.
Араадьыйаҕа кэпсиир наһаа интэриэһинэй уонна долгутуулаах эбит. Наушник кэтэн баран истэн олороҕун, онно барыта үчүгэй баҕайытык иһиллэр. Бастакы холонуум буолан долгуйбутум. Дьоннорум этэллэринэн, үчүгэйдик кэпсээбиппин. Аҕыйах мүнүүтэ устата син барытын кэпсээбитим дии саныыбын.
Быйыл атырдьах ыйыгар Дьокуускай куоракка «Энергетик» лааҕырга «Төрүччү» сменатыгар сылдьаммын, төрдү-ууһу үөрэтии туһунан билиибин кэҥэппитим.
Эһэм туһунан үөрэппит үлэбин өссө кэҥэтэр санаалаахпын. Ол иһин «Кэскил» оҕо бэчээтин кыһата ыытар «Төрүччү» научнай үлэни көрүү куонкуруһугар кыттар санаалаахпын.
Миэхэ олоҥхону аан бастаан аҕам Константин Егорович Лазарев үөрэппитэ уонна: “Эһэҥ олоҥхоһут этэ. Онон кинини баттаххына олоҥхону сатаан толоруохтааххын”, – диэбитэ.
Эһэм Егор Родионович Лазарев Уус Алдан улууһун Кэптэни (Баатаҕай) нэһилиэгиттэн төрүттээх. 1946 сыллаахха Таатта Баайаҕатыгар убайын аахха кэлбит. Таатта сирин-уотун, дьонун-сэргэтин сөбүлээн манна олохсуйа хаалбыт. Норуокка кинини ырыа Лааһар диэн ааттыыллара. Дойдутугар Уус Алдаҥҥа тиийдэҕинэ «Ырыа Лааһар кэлбит үһү» диэн, истиһэннэр, дьон мустан хойукка диэри, ыллатан, олоҥхолотон, хомустатан истэллэрэ эбитэ үһү. Олоҥхоһут эһэбин удьуордаан кэрэни кэрэхсээн олоҥхолуубун. Удьуор утума салҕанар.
Устя ЛАЗАРЕВА, VII кылаас, «Кэскил» оҕо бэчээтин кыһата
«Төрүччү» бырайыагын кыттыылааҕа, В.И. Ленин аатынан
Уолба орто оскуолата, Таатта
***
“Кэскил” оҕо бэчээтин кыһата төрдүс сылын тэрийэн ыытар “Память предков. Генеалогия моей семьи” научнай үлэни көрүү куонкуруһугар үлэлэргитин алтынньы ыйын 31 күнүгэр диэри күүтэбит. https://forms.yandex.ru/u/68e4712b068ff02d7d81319b Яндекс дискэҕэ хачайдыыгыт.
Куонкурус туһунан: https://keskil14.ru/v-yakutii-startoval-respublikanskij-konkurs-nauchno-issledovatelskih-rabot-shkolnikov-pamyat-predkov-genealogiya-moej-semi/
Сиһилии билсэр нүөмэрдэргит: 89244645310, 89142807263, 89627301222.