Мандар Ууска ананар
Мандар Уус — саха чулуу киһитэ,
Өбүгэ үгэһин утумнаан
Уус, уруһуйдьут бастыҥа,
Саха хомуһун дьүрүһүтэр,
Саха быһаҕын уһаарар,
Уран тарбахтаах уруһуйдьут,
Бөлүһүөк бастыҥа,
Саха оһуорун-мандарын үөрэтээччи,
Норуот кутун тутааччы.
Махтал буоллун Мандарга.
Саха бастыҥ саарыныгар.
Саша Кайгородов, Игидэй орто оскуолатын 6 кылааһын үөрэнээччитэ.
Саха саарына Борис Федорович Неустроев-Мандар Ууска аналлаах кылаас чааһа ыытылынна
Бу кылаас чааһыгар сылдьаммын, Борис Федорович Игидэй нэһилиэгиттэн төрүттээҕин, билигин мин өбүгэлэрим дойдутугар Баайаҕа нэһилиэгэр олохсуйан олорорун сэҥээрэ иһиттим. Кини 1945 сыллаахха алтынньы 20 күнүгэр төрөөбүт. Военнай флокка сулууспалаабыт. Онтон физкультура учууталынан үлэлээн, спордунан утумнаахтык дьарыктаммыт. Тустуу уонна бокса курдук уустук көрүҥнэри баһылаабыт.
Бэйэтэ айылҕаттан ураты дьоҕурдаах киһи буолан, айылҕалыын күүскэ алтыһар эбит. Ураты талаана уруһуйга уонна уһаныыга бэриллибит. Саха оһуорун-мандарын чинчийэн үөрэтэн Мандар диэн ааттаммыт. Олус киэҥ бөлүһүөктүү өйдөөх, Саха сирин барытын кэрийэн саха култууратын норуокка кэпсээн тарҕаппыт.
Мандар Уус биһиги нэһилиэкпит гербэтин оҥорбутун туһунан олус сэҥээрэн иһиттим. Өрөспүүбүлүкэ иистэнньэҥнэрин барытын түмэн, туоһунан Моҕол ураһа тиктэрэн, дойдутугар Баайаҕа нэһилиэгэр комплекс туттарбыта.
Бу курдук уһулуччу талааннаах саха саарынынан биһиги киэн туттабыт.
Үбүлүөйүнэн эҕэрдэлиибин! Уһун олоҕу баҕарабыт!
Георгий Захаров, Игидэй орто оскуолатын 6 кылааһын үөрэнээччитэ.
Борис Федорович Неустроев 80 үбүлүөйдээх сылынан
Саха саарына, Таатта улууһун олохтооҕо Борис Федорович Неустроев төрөөбүтэ 80 сылынан Игидэй орто оскуолатын үөрэнээччилэригэр, нэһилиэк иһинэн үлэлиир «Иэйии» литературнай түмсүү чилиэннэрэ олус дириҥ ис хоһоонноох, сэргэх кылаас чааһын ыыттылар.
Мандар олоҕун, айар үлэтин туһунан модельнай библиотека салайааччыта Жулева Кристина Алексеевна сырдатта. Мандар спортка дьоҕурун туһунан ветеран учуутал Матаннанова Мавра Павловна билиһиннэрдэ.
Баайаҕаҕа тутуллан турар туос Моҕол Ураһа туһунан ветеран сэбиэтин бэрэсэдээтэлэ Анна Константиновна Аргунова кэпсээниттэн сэҥээрдибит.
Попова Мария Ивановна бэйэтэ айбыт хоһоонун ааҕан иһитиннэрдэ. Оонньуу оонньотон сэргэхситтэ.
Бу курдук олус сэргэх кылаас чааһыттан биһиги үөрэнээччилэр олус астынныбыт, үөрдүбүт.
Инна Варламова, Тася Попова, Игидэй орто оскуолатын 9 кылааһын үөрэнээччилэрэ.
Салайааччы Варвара Константиновна Ефимова, саха тылын, литературатын учуутала.
«Иэйии» литературнай түмсүү чилиэнэ.
keskil14.ru