Биһиги тапталлаах Майабыт күн аайы үүнэн-сайдан, тубустар-тупсан иһэр. Сэлиэнньэбит сирэ-уота элбэх талааннаах киһини иитэн таһаарбыта. Үлэ — дьол аргыһа. Онон, биһиги И.Г. Тимофеев аатынан Майа лиссиэйин үөрэнээччилэрэ кэрэ дойдубут сайдыытыгар үлэлии-хамсыы сылдьар үлэһиттэрбитин сырдаттыбыт.
Тутааччылар, инженердар, плотниктар — бары биһиги олорор дьиэлэрбитин, сынньалаҥ кииннэрин, үөрэх-билии кыһаларын туппуттара уонна да атын тутууларга күүстээх үлэни ыыталлар.
Майа сэлиэнньэтэ спорт өттүнэн олус сайдыылаах. Хас да төгүллээх өрөспүүбүлүкэ чөмпүйүөннэрин, Сибиир уонна Илин Уһук кыайыылаахтарын таһаартаабыта. Билигин эмиэ охчуттар, хапсаҕайдьыттар, тустууктар, мадьынылар, чэпчэки атлетиканан дьарыктанар ыччат Майабыт уонна улууспут аатын чиэстээхтик көмүскүүллэр.
Учуутал диэн сүрүн идэлэртэн биирдэстэрэ буолар. Кинилэр баар буоланнар, үөрэнээччилэр кыра саастарыттан олус элбэҕи үөрэтэллэр, билиилэрин хаҥаталлар. Ийэ тыл, литература, математика, история — бары салааларга Майа оскуолаларын үөрэнээччилэрэ ситиһиилээхтик кытталлар, үөрэнэллэр. Учууталлар үлэлэрэ — бу саҥа көлүөнэ олохтоохторун иитии.
Атыыһыт идэлээх дьон хас биирдии нэһилиэккэ баар буолар. Кинилэр атыы-эргиэн тэрилтэлэринэн үлэлээн, нэһилиэкпит олохтоохторун күнүстэри-түүннэри аһынан-үөлүнэн, малынан-салынан хааччыйаллар.
Онон, хас биирдии үлэһит киһи Майабыт үүнэригэр-сайдарыгар, үрдүк култууралаах, элбэх дьонноох-сэргэлээх сэлиэнньэ буоларыгар бэйэлэрин сүдү кылааттарын киллэрэллэр. Хас биирдии идэ олус наадалаах, улахан оруоллаах. Майа олохтоохторо үлэни-хамнаһы инники күөҥҥэ тутан, үлэҕэ ытыктабыллаахтык сыһыаннаһан, дойдубут туспарыгар көмөлөһөбүт. Үлэ — олох ууһа, олох киинэ!
Сиһилии видео-матырыйаалга көрүҥ:
Суруйда: Марианна Миронова, X кылаас,
Ыытааччы: Мусьяна Попова, VIII кылаас,
Закадровай куолас: Тася Трофимова, X кылаас,
Видеоны таҥна: Алеся Тимофеева, X кылаас,
И.Г. Тимофеев аатынан Майа лиссиэйэ.
keskil14.ru