Үбү-харчыны сөпкө аттаран туттуу олохпутун чэпчэтэр, күннээҕи олоххо туруктаах буолары мэктиэлиир. Бүгүн Дүллүкү нэһилиэгин библиотекатыгар үбү-харчыны таба туһанарга аналлаах «Финансовая грамотность» кабинет аанын үөрүүлээхтик арыйда.
Кабинет арыллыытыгар оскуола үөрэнээччилэрэ, улахан дьон кэлэн кытыннылар. Үөрүүлээх тэрээһини Дүллүкүтээҕи Култуура уонна сынньалаҥ киинин уус-уран салайааччыта Мария Руслановна Федотова ыытта. Аалай лиэнтэни Дүллүкү нэһилиэгин дьаһалтатын сүрүн специалиһа Нина Николаевна Ильина уонна библиотекарь Яна Октябровна Борисова быстылар.
Үөһээ Бүлүү улууһун үп салаатын салайааччыта Зульфия Рафиковна Данилова олохтоох нэһилиэнньэ финансовай өттүнэн билиитин үрдэтэргэ аналлаах кабинет аһыллыбытынан истиҥник эҕэрдэлээтэ. Салгыы 5-7 кылаас үөрэнээччилэрэ «Финансовые ситуации» биктэриинэҕэ кыттан билиилэрин тургуттулар.
Бэлиэ күҥҥэ кэлбит дьонтон Ирина Иннокентьевна Томская «Нумизматика диэн тугуй?» тиэмэҕэ иһитиннэрии оҥордо. Кини араас омук харчытын мунньар эбит. Ирина Иннокентьевна коллекциятыгар Кытай, Кыргыстаан, Армения, Узбекистан, Турция, Африка, Франция, Белоруссия, Монголия о. д. а. дойдулар кумааҕы уонна бытархай харчылара бааллар.
«Коллекцияҕыт сыаналаах кумааҕытынан, үрүҥ көмүс манньыаттарынан инвестиция оҥостуоххун сөп, сыаната түһэр-тахсар, барыыстаах буолар», — диэн эттэ. Оҕолор араас омук харчытын сөҕө-сэргии көрдүбүт.
Нина Николаевна Ильина харчыны хайдах сөпкө мунньунан атын дойдуну көрө, күүлэйдии барыахха сөбүн туһунан сиһилии кэпсээтэ. «Харчы мунньан айанныырга S7 карта табыгастаах. Бу карта билиэт ыларга, багаж ыйааһыныгар, «бизнес-класска» айанныырга туһалаах. «Россельхозбаан»-ҥа омук сиригэр илдьэ сылдьан туһанарга UnionPay карта баар. Картанан маҕаһыыҥҥа, музейдарга сылдьыахха сөп«, — диэн бэйэтэ туһаммытын эттэ.
Клавдия Александровна Герасимова софинансирование көмөтүнэн харчыны элбэтэр туһунан кэпсээтэ. Онтон Яна Октябровна «Финансовая подушка безопасности» диэн онлайн бааҥҥа уурунуу харчы туһатын туһунан билиһиннэрдэ. «Гарант» систиэмэни, «Госуслуги», «E-Якутия» сыһыарыыларга хайдах киирэри улахан экраҥҥа көрдөрдө.
Тэрээһинтэн олус элбэҕи билэн-көрөн тарҕастыбыт. Үбү-харчыны сөпкө туһанарга көмөлөөх кабинет бүгүҥҥү түргэн тэтимнээх, сайдыылаах олохпутугар нэһилиэнньэҕэ олус туһалаах буолуо.
Амина Степанова,
VII кылаас,
«Эрчим» медиакиин, Дүллүкү орто оскуолата, Үөһээ Бүлүү