Бүтэйдээх орто оскуолата быйылгы үөрэх дьылын олус үчүгэй сонуннаах көрүстүбүт. Ол курдук, Бүтэйдээх орто уопсай үөрэхтээһин оскуолата «Чоргуй, Чообуо чабырҕах» бырайыагы олоххо киллэриигэ, Президент культурнай көҕүлээһиннэрин фондаларын куонкурсугар кыттан, кыайыылааҕынан тахсан, Грант ылары ситистэ.
Бырайыак чэрчитинэн, оскуола оҕолоругар саха культуратын тарҕатыыга туһуламмыт кэккэ тэрээһиннэр ылынан былааннаннылар. Бырайыак ааптара уонна салайааччытына үрдүк категориялаах алын кылаас учуутала, Арассыыйа Федерациятын үөрэҕириитин эйгэтин бочуоттаах үлэһитэ Надежда Владимировна Иванова буолар.
Билигин, оскуола оҕолоругар саха кырыымпаларын, хомустарын, күпсүүрдэрин сакааска оҥотторон ыллылар. Бу бырайыакка саха инструменнарынан оонньууну үөрэтиигэ маастар-кылаастары ыытыахтара, көрдөрүөхтэрэ.
Өр сыллар усталарыгар оскуолаҕа «Кэрэли» оҕолору эбии үөрэхтээһин киининигэр үрдүк категориялаах алын кылаас учуутала Лилия Егоровна Осипова фольклорнай куруһуогар араас саастаах үөрэнээччилэр хомуска оонньууллар, чабырҕах толоруунан дьарыктаналлар. «Чуораанчык», «Дьуруйаана» фольклорнай кэллэктииптэр оройуон уонна өрөспүүбүлүкэ таһымнаах араас көрүүлэргэ, куонкурстарга кыттан сыллата бириистээх миэстэлэри ылаллар. Ааспыт үөрэх дьылыгар кыайыыларынан эҕэрдэлээбиппит. Ол курдук, өрөспүүбүлүкэтээҕи фольклорнай куонкурска Гран-при үрдүк аатын ылбыттара, «Фольклор детям» өрөспүүбүлүкэтээҕи фольклорнай марафоҥҥа Лилия Егоровна 1 миэстэни, «Араас омуктар Фольклордара» педагогическай ааҕыыларга III миэстэни ылбыта. Москваҕа «Фолк-звезда» Норуоттар икки ардыларынааҕы фольклорнай бэстибээлгэ «Чуораанчык» коллектив 2 степеннээх лауреат, онтон хомусистар ансамбыллара 3 истиэпэннээх лауреат буолан ситиһиилэрэ үгүс.
Балаҕан ыйын 26 күнүгэр, Бүтэйдээх нэһилиэгэр «Айхал» сынньалаҥ киинигэр «Чоргуй, чообуо чабырҕах» бырайыак Арассыыйа Федерациятын Гранын ылбытын чиэстиир үрдүк таһымнаах тэрээһин буолан ааста. Бу тэрээһиҥҥэ барыта 100-тэн тахса киһи кыттыыны ылла. Тэрээһиҥҥэ улуустааҕы үөрэх салалтатыттан, «Кэрэли» эбии үөрэхтээһин тэрилтэтиттэн, Майа, Тиэлиги, Алтан орто оскуолатыттан фольклорнай коллективтар кэлэннэр эҕэрдэлээн бардылар.
Балаҕан ыйын 29 күнүгэр, нациоанльнай көрөдөрөр-иһитиннэрэр хампаанньа телевидениетын быһа эфирыгар «Саҥа күн» бырагырааммаҕа бырайыак салайааччыта Иванова Надежда Владимировна, фольклор коллективтарын салайааччы Осипова Лилия Егоровна уонна ансаамбыл кыттыылаахтара көстүбүттэрэ. Грант, бырайыак сыалын-соругун туһунан кэпсээбиттэрэ.
Биһиги оскуолабыт үрдүк ситиһиилэнэн, бу үөрэх дьылыгар бырайыак олоххо киирэн, элбэх тэрээһиннэр буолуохтара, оҕолор төрүт культураҕа угуйуллуохтара, үүнүөхтэрэ, сайдыахтара, талааннара арыллыаҕа. Биһиги оскуолабыт хамаандатын, коллективын уонна үөрэнээччилэрин итиитик-истиҥник эҕэрдэлиибит!
Эльвира Чичахова,
XI кылаас,
Бүтэйдээх орто оскуолата,
Мэҥэ Хаҥалас