Илья Егорович Винокуров аатынан Намнааҕы педагогическай колледжка аҕам саастахтар уонна бэтэрээн учууталлар декадалара саҕаланна.
Декада чэрчитинэн, киэн туттар, сүгүрүйэр, ытыктыыр бэтэрээн учууталларбыт кэлэн ыалдьыттаан, үлэлээн ааспыт кэмнэрин ахтан-санаан аастылар.
Биһиги колледжпыт Ытык дьоно кимнээҕий?
Матрена Афанасьевна Пестрякова — рукоделия сэкэрэтээрэ (1965-1993 сс.), Саха Өрөспүүбүлүкэтин үөрэҕириитин бочуоттаах бэтэрээнэ; Василий Семенович Протопопов — столяр (1994-2003 сс.), Үлэ Знамятын уордьанын кавалера; Екатерина Павловна Павлова — уруһуй уруогун учуутала (1969-1996сс.), Арассыыйа үөрэҕириитин туйгуна, СӨ култууратын туйгуна, Учууталлар Учууталлара; Фёдор Фёдорович Павлов — уруһуй уруогун учуутала (1977-2017 сс.), Арассыыйа худуоһунньуктарын сойууһун чилиэнэ, РФ СПО бочуоттаах үлэһитэ, СӨ үөрэҕириитин үтүөлээх үлэһитэ, Учууталлар Учууталлара, Нам улууһун бочуоттаах олохтооҕо; Спиридон Васильевич Оконешников — үлэҕэ уонна баһаарынай куттал суох буолуутун инженерэ (1997-2008 сс., СӨ тутууга комплексын ветерана; Екатерина Васильевна Ядреева — Илья Егорович Винокуров аатынан Намнааҕы педколледжка өр сылларга дириэктэринэн үлэлээбитэ, техническэй наука кандидата, СӨ үтүөлээх учуутала; Марианна Авксентьевна Колодезникова — РСФСР үөрэҕириитин туйгуна, орто үөрэхтээһин туйгуна; Татьяна Сергеевна Степанова өр сылларга оскуола ырааһын тутааччынан үлэлээбитэ; Зинаида Дмитриевна Понохова — РФ норуотун үөрэҕириитин туйгуна, норуот маастара, СӨ үөрэҕириитин туйгуна, Нам улууһун бочуоттаах олохтооҕо, Учууталлар Учууталлара, СӨ култууратын туйгуна, Арассыыйа уопсай үөрэхтээһинин бочуоттаах үлэһитэ, СӨ үөрэхтээһинин бочуоттаах ветерана.
Ытык дьоммутун көрсөн бэйэлэрин санааларын этэллэригэр көрдөстүм.
Сэрии сылын оҕото Василий Семенович Протопопов Намтан 80-тан тахса килэмиэтирдээх Салбан диэн сиргэ төрөөн, начаалынай оскуолаҕа үөрэнэн, Хамаҕаттаҕа киирэн сэттис кылааска диэри үөрэммит.
— 14 сааспыттан холкуоска үлэлээн, үлэттэн атыны санаабат буолбутум. Уон бииргэ төрөөбүппүттэн, билигин соҕотох хаалан олоробун. Аҕабыт биир саастаахпар өлөн, ийэбит бэйэтэ улаатыннарбыта. Үлэ киһиэхэ хаһан да куһаҕаны аҕалбат. Үлэни өрө тутан, 88 сааспар диэри этэҥҥэ олоробун. Онон оҕолорго үлэлээн-хамсаан, үөрэхтээх дьон буолуҥ, — диэн ытык кырдьаҕас Василий Семенович Протопопов санаатын үллэһиннэ.
Сэрии сылын оҕото Матрена Афанасьевна Пестрякова педучилищеҕа 1965 сылтан 22 сыл сэкэрэтээр-машинистканан үлэлээбитэ. Кэлин звонок биэрээччинэн үлэлээн, биэнсийэҕэ тахсыбыт.
— Бииргэ үлэлээбит дьоннорбун наһаа үчүгэйдик саныыбын. Оччолорго педучилищеҕа наһаа да үчүгэйдик үлэлээн-хамсаан ааспыппыт диэн куруук үөрэ-көтө кэпсиибин. Бары дьоллоох-соргулаах, уһун үйэлээх буолуҥ, — диэн Матрена Афанасьевна Пестрякова санаатын үллэһиннэ.
Ити курдук Илья Егорович Винокуров аатынан Намнааҕы педучилище бэтэрээн үлэһиттэрэ ирэ-хоро кэпсэтэн, эдэр саастарын санаан астынан дуоһуйан бардылар.
Бэтэрээн учууталларбытыгар анаан педколледж устудьуоннара бүгүҥҥү үөрүүлээх күҥҥэ эҕэрдэ кэнсиэр көрдөрөн, сылаас истиҥ сыһыаннаах бэлэхтэрин туттардылар.
Эрчим НИКОЛАЕВ, И.Е.Винокуров аатынан Намнааҕы педучилище устудьуона