Балаҕан ыйын биир саамай үтүө, кэрэ бэлиэ түгэнин, Саха сирин Судаарыстыбаннаһын үбүлүөйдээх 35 сылын бэлиэтиир тэрээһин чэрчитинэн, Н.Е.Иванов аатын Бөтүҥ орто агрооскуолатыгар сэргэх тэрээһиннэр буоллулар.
Үөрүүлээх линейкаҕа кэлбит ыҥырыылах ыалдьыттары, дьокутааттары кытта Сахабыт сирин өрөгөй ырыатын ыллаһан, былаахпытын өрө таһааран, сахалыы таҥастаах көрүстүбүт. Этиллэрин курдук, бу күн 1990 сыллаахха саха норуотун улаханнык өрүкүппүт, тыынын уһаппыт, хараҥаҕа тыкпыт күн кэриэтэ суолталаммыт судаарыстыбаннай суверенитет декларацията ылыллыбыта 35 сылын бэлиэтиибит.
Оскуолабыт дириэктэрэ Акулина Иванова былырыыҥҥы үөрэх дьыла хайдах ааспытын туһунан кэпсээтэ, ситиһиилэри бэлиэтээтэ, баҕа санаатын тиэртэ. «Бөтүҥ нэһилиэгэ» тыа сирин түөлбэтин баһылыга Саргылана Борисова эҕэрдэ тылы кытта Бүтүн Арассыыйатааҕы «Бастакылар» оҕо хамсааһынын «Мин—Арассыыйа гражданинабын!» бырайыак кыттыылаахтарыгар, сокуоннай сааһын туолбуттарын туоһулуур бэлиэни уонна пааспар хаҕын VII-VIII кылаас үөрэнээччилэригэр үөрүүлээх быһыыга-майгыга туттарда.
Быйыл биһиги өрөспүүбүлүкэбит историятыгар улахан суолталаах түгэннэринэн – Улуу Кыайыы 80 сылын, «Азия оҕолоро» норуоттар икки ардыларынааҕы спортивнай оонньуулар ыытыллалларын туоһулуур ыйаах ылыллыбыта 30 сылын бэлиэтээтибит.
Линейкабыт түмүк чааһыгар «Эрэл» оҕо хамсааһынын көхтөөх оҕолоро флешмоб үҥкүүлэттилэр. Өйдүү-саныы сылдьарбытыгар диэн уопсай хаартыскаҕа түстүбүт. Уонна ыҥырыылаах ыалдьыттарбытын кытта аһаҕас кылаас чаастарыгар тарҕастыбыт.
Виолетта Иванова, «Сайдам» медиа киин чилиэнэ,
VIII кылаас үөрэнээччитэ, Бөтүҥ, Амма
keskil14.ru