Бүгүн Саха Өрөспүүбүлүкэтин судаарыстыбаннаһын күнүн көрсө А.Е. Мординов аатынан Тааттатааҕы лиcсиэйгэ СӨ Бырабыыталыстыбатын Бэрэссэдээтэлин солбуйааччы Сергей Васильевич Местников, Таатта улууһун баһылыга Айаал Семенович Бурцев, үөрэх салаатын начальнига Иннокентий Иннокентьевич Дягилев ыалдьыттаатылар.
Сергей Васильевич оҕолору кытта көрсүһүүтүн аһаҕас кэпсэтии форматынан ыытта. “Эһиги дьоллоох оҕолоргут, маннык саҥа ыраас оскуолаҕа үөрэнэр. Манна, Тааттаҕа, Улуу убайдарбыт дойдуларыгар, кинилэр сыдьааннарыгар кэлэн көрсүһэр олус долгутуулаах буолар эбит”, — диэн кэпсэтиини саҕалаата. Үөрэнээччилэргэ төрөөбүт дойдуларын историятын төһө билэллэрин тургутан ыйытыктары биэртэлээтэ. Оҕолор ыйытыктарга хомоҕойдук эппиэттэһэн, кэпсэтиигэ кыттыстылар. «Ааҕыҥ, чинчийиҥ, сайдыҥ, төрөөбүт тылгытын, култуураҕытын өрө тутуҥ. Эһиги аны аҕыйах сылынан өрөспүүбүлүкэни салайар, кини сайдыытыгар үлэлиир-хамныыр дьон буолуоххут» — диэн тылларынан Сергей Васильевич кэпсэтиини түмүктээтэ.
Оскуолабыт дириэктэрэ Изабелла Александровна дохсун ытыс доҕуһуолунан Сергей Васильевичка «Оскуола бочуоттаах мецената» диэн анал ааты туттарда. Салгыы бу күн саастарын сиппит оҕолорбутугар паспорт туттарыытын үөрүүлээх түгэнэ буолла. Бэлиэ түгэн учууталлар уонна оҕолор «Умсулҕан» ааҕар бөлөхтөрүн ийэ дойдуга анаммыт дьүhүйүүлэринэн доҕуһуолланна. Быйылгы 11 кылаас үөрэнээччилэрэ Монголияҕа ыытыллыбыт Аан дойду ыһыаҕар сылдьыбыппытын туһунан хаартыска быыстапкатын уонна биһиги өрөспүүбүлүкэбит үгэстэригэр, культуратыгар харыстабыллаах сыһыан холобура буолбут «Умсулҕан» оскуола лааҕырын туһунан ыальдыттарбытыгар кэпсээтибит.
Дьоро күн уопсай хаартыскаҕа түһүүнэн түмүктэннэ. Саха өрөспүүбүлүкэтигэр салгыы үгүс сайдыыны баҕарабыт! Үүнэ, сайда тур, тапталлаах Сахабыт сирэ!
Сиһилии:
Дайаана Боярова, Аслан Местников, Настя Парфенова, Алина Унарова, X кылаас үөрэнээччилэрэ, Тааттатааҕы лиссиэй юнкордара,
Ытык Күөл, Таатта