Дьокуускай куорат аэропордугар бүгүн, балаҕан ыйын 13 күнүгэр, «Мохсоҕол» байыаннай-патриотическай кулууп иитиллээччилэрин Дьоруой-куорат Волгоградтан Бүтүн Арассыыйатааҕы «Зарница 2.0» күрэххэ ситиһиилээхтик кыттан кэлбиттэрин үөрүүлээх быһыыга-майгыга көрүстүлэр. Афанасий Осипов аатынан Бэрдьигэстээх орто оскуолатын үөрэнээччилэрэ Уһук Илиҥҥи уокурук «Зарница 2.0» байыаннай-патриотическай оонньуу кыайыылаахтара. Бүтүн Уһук Илиҥҥи уокуругу федеральнай күрэххэ үрдүк чиэстээхтик көмүскээн кэллилэр.
Ситиһиилэрэ:
Сапер Дьулус Екечьямов тус күрэхтэһиигэ — 2 миэстэ.
БПЛА көтүтээччилэр Айархан Афанасьев уонна Марк Петров — үрүҥ көмүс мэтээл хаһаайыннара, кыайыылаахтартан биир эрэ сөкүүндэ кыайтардылар.
Хамаандаҕа кимнээх баалларый?
Салайааччы — Владимир Ефимович Тарасов, А.Н. Осипов аатынан Бэрдьигэстээх орто оскуолатын дириэктэри иитэр үлэҕэ солбуйааччы, физкультура учуутала
Хамандыыр — Толя Павлов
Сапер — Дьулус Екечьямов
БПЛА көтүтээччилэр — Айархан Афанасьев, Марк Петров
Медиктэр — Данилика Сидорова, Айыына Иванова
Штурмовиктар — Эрэл Алексеев, Слава Федоров
Политрук — Мирон Бурнашев
Военкор — Айхал Васильев
Оҕолору Бүтүн Арассыыйатааҕы оҕо уонна эдэр ыччат хамсааһынын Саха сиринээҕи салаатын салайааччытын солбуйааччыта Александр Кузьмин салайааччылаах делегация көрүстэ. Төрөппүт Прасковья Анатольевна Афанасьева уолун Айарханы тоһуйан көрүстэ уонна санаатын бу курдук үллэстэр:
— Оҕолорбут байыаннай-патриотическай кулуупка сылдьан дьарыктаналлара эт-хаан, өй-санаа өттүнэн сайдаллар, киһи, патриот быһыытынан үүнэллэр, этэргэ дылы, уонна дьарыктаах буолаллар. Биһиги, төрөппүттэр, махталбытын салайааччыга Владимир Ефимовичка этэбит, кыһыннары-сайыннары оҕолору илдьэ сылдьан, дьарыктаан, сайын биир да күн сынньамматылар, барытыгар илдьэ сылдьан сыралаахтык дьарыктаата. Оҕолору походтарга илдьэ сылдьар, «ВОИН» киинтэн кэлэн олус улаханнык көмөлөһөн барбыттара. Дьоруой-куоракка Волгоградка, аҥардас Мамаев Кургаҥҥа сылдьыбыттара, эһэлэрэ, хос эһэлэрэ кыргыспыт сирдэрин илэ харахтарынан көрбүттэрэ, Улуу Кыайыы хайдах курдук ыараханнык кэлбитин билэн-көрөн кэлбиттэрэ хаһан да хатыламмат уонна умнуллубат. Оҕолорбут бу курдук сылдьаллара олус туһалаах, олус сайдан, өйдүүн-санаалыын уларыйан, үүнэн кэлэллэр.
«Зарница 2.0» байыаннай-патриотическай оонньуу кыттыылаахтара Волгоград куорат бэлиэ сирдэринэн сырыттылар. Оҕолор саамай сөҕө-махтайа Волгоград куорат тэбэр сүрэҕэр — Мамаев Кургаҥҥа сырыыларын кэпсииллэр. «Сталинградтааҕы кыргыһыы» панорама түмэлигэр сылдьан сэрии хонуутугар охтубут саха буойуттарыгар анаан сибэкки дьөрбөтүн уурбуттар.
Онтон «Мохсоҕол» байыаннай-патриотическай кулууп салайааччыта Владимир Тарасов оҕолор Арассыыйа 8 эрэгийиэннэриттэн сылдьар 24 хамаандаттан хаалсыбакка, тэҥҥэ киирсибиттэрин бэлиэтээн этэр. Үчүгэй көрдөрүүлээх: үс үрүҥ көмүс мэтээллээх эргиллибиттэрин үөрэ кэпсиир. «Маннык ситиһиини Саха сирин хайа баҕарар байыаннай-патриотическай кулууба ситиһэр кыахтаах. Сүрүнэ — баҕалаах оҕолор, өйүүр төрөппүттэр уонна тэҥҥэ үлэлэһэр настаабынньыктар бааллара буолар. Биһиги билигин туох баар сыыһабытын-алҕаспытын көрүнэн, аныгыс сырыыга хайаан даҕаны финалга миэстэлэһэр санаалаахпыт», — диэн Владимир Ефимович этэр.
Көрсүһүү түгэннэрин видеоҕа көрүҥ:
keskil14.ru