Бу күннэргэ Чурапчы улууһунааҕы үөрэх үлэһиттэрин Балаҕан ыйынааҕы сүбэ мунньахтара буолан ааста. Ол чэрчитинэн, «Айылгы» норуот айымньытын дьиэтигэр Чурапчы улууһун оскуолаларын «Туһалаах сайын» диэн сайыҥҥы оҕо сынньалаҥын лааҕырдарын быыстапкалара турда. Хас биирдии оскуола сайыҥҥы лааҕырдарын үлэлэрин түмүгүн сырдаттылар.
Онтон биһиги биһиги быйыл сайын оскуолабыт иһинэн үлэлээбит «Сыккыс» лааҕырбыт туһунан кэпсээтибит.
Лааҕырбыт хайысхата — үлэ лааҕыра, сүһүөхтэринэн арахсан үлэлээбиппит. Алын кылаас оҕолоро оскуола таһынааҕы сибэккилэри үүннэрбиттэрэ, уу куппуттара. Онтон орто сүһүөх оҕолоро Федор Игнатьевич Борисов салайааччылаах эмтээх оту хомуйуунан уонна тургэник ситэр пекинскай кустары иитиинэн дьарыктаммыттара. Үрдүкү кылаастар Роман Васильевич Поисеев уонна оскуолабыт дириэктэрэ Аида Алексеевна Томская салалталарынан бастыкыларын ыҥырыа иитиитинэн дьарыктаммыттара.
Лааҕырбыт үлэтин түмүгүн сүбэ мунньах кыттыылаахтара олус сэҥээрдилэр. Кинилэр иннилэригэр дьиэ ыраастыыр хомуур, эмтээх от арааһын, эмтээх чэй, ньээм от мүөтүн, ыҥырыа мүөтүн көрдөрдүбүт, баҕалаахтар амсайдылар. Бу бородууксуйа уопсай аата «Алаас алгыстаах амтана» диэн.
Дьэ кырдьык, Хайахсыппыт алаастарыгар үүнэр эмтээх оттортон, сибэккилэртэн оҥоһуллубут, сибэккилэртэн хомуллубут мүөппүт чөл туруктаах буолууга алгыыр.
Сардаана ПЕТРОВА, Лиана КАЖЕНКИНА, VII кылаас,
А.П. Илларионов аатынан Хайахсыт орто оскуолата, Чурапчы