Балаҕан ыйын 1 кунүгэр биһиги оскуолабытыгар билии күнүгэр анаммыт икки үөрүүлээх линейкалар буолубуттара.
Билии күнүнэн учууталларга, үөрэнээччилэргэ, ыалдьыттарга, төрөппүттэргэ оскуолабыт директора Мария Леонидовна Прокопьева бэйэтин эҕэрдэтин эттэ. Кини барыларыгар ситиһиилээх үөрэх дьылын баҕарда, бастакы кылаас үөрэнээччилэригэр уонна оскуола выпускниктарыгар туспа эҕэрдэтин эттэ. Учууталлары уонна төрөппүттэри үүнэр көлүөнэ чэчирии сайдарын туһугар бииргэ үлэлииргэ, сайыннарарга ыҥырда.
Бу күн биһиги оскуолабыт оҕолорун СӨ ЖКХ уонна энергетика миниистирэ Емельянов Вячеслав Павлович, Саха сирин тас сибээскэ уонна норуоттар дьыалаларыгар министрин 1-кы солбуйааччы Хатылыков Сергей Александрович, Дьокуускай куорат Дууматын депутата Аммосов Владимир Владимирович, «Алмазэргиэнбанк» АКБ департаменын директора Байлохова Саргылана Александровна, Анал байыаннай операция кыттыылаахтара Филиппов Леонид Алексеевич, Петухов Ньургун Дмитриевич кэлэн эҕэрдэлээтилэр.
Быйыл биһиги оскуолабыт 240 бастакы кылаас үөрэнээччитигэр аанын арыйда. Кинилэргэ Дьокуускай куорат баһылыгын Евгений Григорьев аатыттан бэлэхтэри туттардылар, ону тэҥэ «Алмазэргиэнбанк» хампаанньа финансовой грамотность туһунан кинигэлэри туттартаата.
«Верьте в себя» диэн эҕэрдэ нүөмэринэн «39-с нота» вокальнай ансамбль, «Туймаада Бриллианнара» художественнай гимнастика кулууп иитиллээччилэрэ, Арассыыйа Хотойдоро, Бастакылар Хамсааһыннара уонна Юнармия активистара таҕыстылар. Оскуолабыт үрдүттэн Арассыыйа былааҕа тэллэччи арыллыбыта барыбытыгар дьиҥнээх соһуччу түгэн буолбута. Бу түгэн биир сомоҕо буолуу, киэн туттуу уонна Дойдуга таптал символыгар кубулуйбута.
Үгэс курдук биһиги оскуолабыт үөрэнээччилэрэ «Навигаторы детства» ыыппыт «Самолетик будущего» Бүтүн Россиятааҕы ааксыйаҕа кыттыспыттара.
Билии күнүнэн уонна саҥа үөрэх дьыла саҕаламмытынан ис сүрэхпититтэн бука-барыгытын эҕэрдэлиибит! Күндү үөрэнээччилэрбит, билии аартыгынан хардыылаан, саҥа үрдэллэргэ дабайаҥҥыт үтүө, үлэһит дьон буола улаатыҥ.
Карнелия ПЕТРОВА, Александра ФЕДОРОВА,
VIII Г кылаас үөрэнээччилэрэ,
Н.И. Шарин аатынан 39№дээх орто оскуола, Дьокуускай