Саҥа үүммүт үөрэх дьыла биһиэхэ 2 бүк үөрүүлээх. Быйылгы үөрэх дьылын үөрэ-көтө оскуолабыт саҥа дьиэтигэр көрүстүбүт.
Үөрүүлээх линейкаҕа дириэктэр Изабелла Александровна Сивцева оскуоланы 50 оҕо бүтэрбититтэн үрдүк үөрэх кыһаларыгар 40 оҕо киирбитин, бу 80%-ҥа тэҥнэһэр уонна 10 выпускник анал орто үөрэхтэргэ киирбиттэрин иһитиннэрдэ. Ситиһии төрдө үөрэтэр учууталларга, саҥа оскуолабыт аһыллыыта, кылаас салайааччылара (А.В. Слепцова, А.Ю. Тарасенко, А.А.Федорова) оҕо тус траекториятын сөптөөхтүк аттарбыттара уонна профильнай үөрэхтээһиҥҥэ «Саханефтегаз» кылааһын депутаппыт Виктор Николаевич Лебедев көмөтүнэн арыйан ситимнээх үлэ барбыта буолар. Ону бу кылааска үөрэммит оҕолор 100% бүддьүөккэ киириилэрэ туоһулуур. Өссө анал бырагырааммаларынан 3 оҕону таланнар целевой тэрилтэлэри кытта инники үлэлииллэригэр илии баттастылар. Онно биһиги выпускникпыт Айтал Кириллин кииристэ. Быйылгы үөрэх дьылыгар тургутуктары ааһан cаҥа бэһис кылаастарга 60 оҕо оскуола боруогун атыллаата.
Билии күнүнэн эҕэрдэлии уонна кэс тылы улуус баһылыгын солбуйааччы Руслан Игнатьевич Захаров, нэһилиэк баһылыгын солбуйааччы Артур Евгеньевич Миронов, улуус үөрэҕирии салаатын начальнига Иннокентий Иннокентьевич Дягилев уонна прокурор солбуйааччыта Дмитрий Александрович Васильев эттилэр.
Оскуола салалтата сылтан сыл эр дьону учуутал үлэтигэр тардыыга күүскэ үлэлиир. Ол курдук, быйылгы үөрэх дьылыгар ОБЗР учууталынан выпускникпыт Айал Рустамович Лазарев уонна физика учууталынан Алгыстан Егорович Никифоров үлэлии кэллилэр. Ону таһынан, психологунан Людмила Васильевна Тистяхова, омук тылыгар Екатерина Григорьевна Захарова.
Олох ирдэбилинэн саҥаттан саҥа сүүрээни биһиги лиссиэйбит салалтата уруккуттан инники күөҥҥэ киллэрэр үтүө үгэстээх. Быйыл ахсыс кылаастан предпрофильнай кылаастары сөргүтэн, кэм ирдэбилигэр сөп түбэһиннэрэн – медиа, биоинженернэй уонна “Саханефтегазсбыт” кылаастары астылар. Оҕолор бу кылаастарга үгүс практикоориентированнай куурусстары ааһыахтара, рефераттары, проектары суруйуохтара уонна полигоҥҥа практика ааһыахтара, инники профессияларын дириҥник киирэн анаарыахтара. Манна производственнай, научнай тэрилтэлэри, университеттэри кытта дуогабардар түһэрсиллиэхтэрэ. Быйылгы дьылга Москва куоракка МФТИ кылаас бүтэриэҕэ.
Үөрүүлээх линейкэ кэннэ кылаас чаастарга тарҕастылар. Ол кэннэ бырааһынньыктааҕы остуол тула эбиэт буолла.
Түмүккэ төрөппүт Петр Тарасов санаатын биһиэхэ маннык үллэһиннэ:
«Мин бу оскуола выпускнига буолабын. Оҕом быйыл лиссиэйгэ үөрэнэ киириэм диэн баҕа санаатын эппитин үөрүүнэн ылыммытым. Баҕалаах оҕо олус элбэх этэ. Бу оскуола урут уруккуттан күүстээх уонна наһаа бэриниилээх учууталлардаах. Быйылгы түмүктэрэ олус үөртэ. Үөрэҕи таһынан иитэр үлэлэрэ дириҥ, оҕо эргиччи сайдарыгар бары усулуобуйа баар, кэрэхсэбиллээҕэ дойдумсах буоларга туһаайыллар. Дьэ, бу буолар дьиҥ- чахчы сахалыы толкуйдаах, Ийэ дойдуга бэриниилээх, үөрэхтээх, эргиччи сайдыылаах буолуу төрдө”.
Наташа МОХНАЧЕВСКАЯ, XI кылаас, Алеша САВВИН, IV кылаас,
“МедиаЦентрТЛ” эдкордара, Ытык Күөл, Таатта