Хоту дойду киһитигэр, миэхэ, Тааттаҕа, «Манчаары оонньууларыгар» барыта олус сэргэх уонна сонун. Онтон «Кэскил» оҕо пресс-киинигэр үлэлиирим икки бүк интэриэһинэй. Онтон бүгүн күрэс төрүт көрүҥнэригэр XXII «Манчаары оонньуулара» тэрийээччилэрэ суруналыыстары кытары көрсүһүүтүгэр сүрэхтэнним.
Ытык Күөлгэ аан бастакытын сылдьабын. Баараҕай тутуулаах «Дьулуруйар Ньургун Боотур» стадиону, саҥа спортивнай комплексы, олус тупсаҕай паарканы, Таатта үрэх үрдүгэр тутуллубут сынньанар сири наһаа сөҕө-махтайа, астына көрдүм. Маннык сүдү тутуулар улахан успуорт түһүлгэтэ ыытыллар сиригэр-уотугар, үп-харчы көрүллэн, олоххо киирэллэр. Аан бастакы пресс-конференциябар миигин эрэ долгуппат боппуруоһу ыйытан холоннум.
Хоту дойдуга, холобур, Эбээн-Бытантайга «Манчаары оонньуулара» курдук улахан успуорт түһүлгэтэ тэриллиэ дуо диэн ыйытыыбар, Саха Өрөспүүбүлүкэтин физическэй култуураҕа уонна успуорка миниистирэ Леонид Николаевич Спиридонов хоруйдаата.
— Сахабыт сиригэр атын оонньуулар эмиэ бааллар. Ол курдук, бу буолаары турар «Манчаары оонньуулара» түөрт сылга биирдэ буолар, Саха сирин норуоттарын спартакиадата эмиэ
түөрт сылга биирдэ буолар, 2027 сылга Ньурбаҕа ыытыллар. Ону таһынан хотугу норуоттарга диэн эмиэ спартакиада ыытабыт. Онно биэс төгүл Эбээн-Бытантай чөмпүйүөн буола сылдьыбыта. Хотугу норуоттар спартакиадалара түөрт сылга биирдэ буолар. 2027 сылга Эдьигээн улууһугар ыытыллыахтаах. Адаптивнай көрүҥнэргэ спартакиада эһиил Бүлүүгэ ыытаары сылдьабыт. Оҕолорго «Спортивные якутяне» спартакиаданы Үөрэх уонна наука Министиэристибэтин кытары бииргэ ыытабыт. Онон хотугу улуустарга спартакиадалары эмиэ ыытабыт.
Маны таһынан успуорт миниистирэ 1997 сыллаахха «Манчаары оонньууларыгар» кыттыыны ылан чөмпүйүөннээбитин уонна ол мөккүөрдээх хапсыһыы буола сылдьыбытын санаан кэпсээтэ.
«Манчаары оонньууларын» чөмпүйүөнэ буолар үрдүк таһым. Саха сиригэр элбэх спортсмен «Манчаары оонньууларын» кыайыылааҕа буолуон баҕарар. Онон күрэстэһээччилэргэ үрдүк чыпчааллары баҕарабын!
Саха Өрөспүүбүлүкэтин Бэрэссэдээтэлин солбуйааччы Сергей Васильевич Местников суруналыыстары кытары көрсүһүүгэ эмиэ кыттыыны ылла. Кини мин ыраах сиртэн кэлэ сылдьарбын сөҕө иһиттэ уонна ситиһиилэри баҕарда.
Сарсын, от ыйын 8 күнүгэр, «Манчаары оонньууларын» үөрүүлээх арыллыыта. Онтон эдэр кэрэспэдьиэннэр үлэбит салҕанар.
Стас ПОПОВ,
«Кэскил» оҕо пресс-киинин эдкора, Кустуур, Эбээн-Бытантай национальнай улууһа.
keskil14.ru