Күрэс төрүт көрүҥнэригэр XXII «Манчаары оонньуулара» төрүт оҕунан ытыы түһүлгэтэ 32 кыраҕы харахтаах кэскиллээх бэргэн ытааччылары муста. Нам улууһун чиэһин 14 саастаах Катя Попова көмүскүүр. Кини Нам улууһун 1 нүөмэрдээх оскуолатын 8 кылааһын быйыл бүтэрдэ, төрүт оҕунан дьарыктаммыта икки сыл буолла.
Эдэр кэскиллээх күрэстэһээччи Дьокуускай куоракка күүстээх сүүмэрдээһини ааһан, маҥнайгы миэстэни ылан, кыттыыны ыла сылдьар.
Төрүт оҕунан ытыыга национальнай таҥаһы кэтии булгуччулаах. Катяҕа эбээтэ «Манчаары оонньууларыгар» кыттарыгар анаан оноҕоһун уктарыгар кээһэх тигэн биэрбит. Онтон хаһыаччыгын Нам улууһун биллиилээх иистэнньэҥэр тиктэрбит. «Бу таҥаспын хас биирдии күрэхпэр харыстаан кэтэбин», — диэн этэр Екатерина Попова. Эдэр спортсменка төрүт оҕунан ытыынан дьарыктанан саҕалаан, эт-хаан, өй-санаа өттүнэн толкуйдуура, күннээҕи сатабыла сүрдээҕин тупсубут.
Төрүт оҕунан ытыыга Таатта улууһуттан уопсайа түөрт оҕо кыттыыны ылар. А.И. Софронов-Алампа аатынан Ытык-Күөл 1 нүөмэрдээх оскуолатын 8 кылааһын үөрэнээччитэ Дайаана Борисова быйыл олунньуга улахан күрэххэ кыттыыны ылан, 82 очукуону куоһаран, успуорт маастарын үрдүк аатын сүкпүтэ.
Дайаана тренерэ Галина Лукинична Ючюгяева-Павлова 1980-с сыллартан төрүт оҕунан ытыынан дьарыктанан саҕалаан, 1983 сыллаахха Сэбиэскэй Сойуус успуордун маастарын толорон, ох саа иккис көлүөнэ охчута уонна тренерэ буолар. Галина Лукинична 2010 сылларга Тааттаҕа төрүт оҕунан ытыыны иккис тыыныгар киллэрэн, күүстээхтик туруорсан, ох сааҕа тренерынан үлэлиир, оҕолору, улахан дьону дьарыктыыр.
Суруйда Яна ГУЗАИРОВА.
Оператор, монтаж Авдей НЕУСТРОЕВ.
Кэрэспэдьиэннэр Снежана ЯКОВЛЕВА, Стас Попов.
«Кэскил» оҕо пресс-киинэ.
keskil14.ru