Төрүт оҕунан ытыы саамай табыгастаах уонна эрдэттэн билгэлэммэт успуорт көрүҥэ. Төрүт оҕунан киһи хаһан баҕарар, хас баҕарар сааһыгар дьарыктаныан сөп, онно хааччах суох. Бүгүн, от ыйын 7 күнүгэр, Саха сирин бэргэннэрэ төрүт оҕунан ытыыга «Манчаары оонньууларыгар» муһуннулар.
Күрэс төрүт көрүҥнэригэр XXII «Манчаары оонньуулара» түмүктүүр түһүмэҕэр барыта 16 хамаандаттан 96 күрэстэһээччи кэлэн кыттыыны ыла сылдьар. Күрэххэ алта бөлөҕүнэн кытталлар: оҕолор (кыргыттар уонна уолаттар), бэтэрээннэр (дьахталлар уонна эр дьон), дьахталлар уонна эр дьон. Хас биирдии категорияҕа хамаандаттан биирдии күрэстэһээччи кыттыыны ылар. Улуустартан сүүмэрдэммит хамаандалар ох курдук оҥостон кэлбиттэрин көрөргө астык.
Төрүт оҕунан ытыы быраабылата
Төрүт оҕунан ытыы быраабылата олус судургу: икки эрчиллииттэн турар. Бастакыга — «куобах», аҕыс сиэрийэни ыталлар, биир сиэрийэҕэ икки ытыы буолар. Онтон «куһу» ыталлар, ол күрэстэһээччигэ икки очукуону биэрэр, эмиэ аҕыс сиэрийэни ыталлар. Онтон «тииҥи» ыталлар, ол үс очукуо биэрэр. Маҥнай биирдиилээн уонна бастыыр иһин күрэхтэһии ыытыллар, ол кэнниттэн ылбыт сууммалара (очукуоларын холбоон), кыайыылааҕы быһаараллар. Успуорт маастарын толорорго охчуттарга уопсай очукуонан ааҕыллар, күрэс мургун нуормата — 76 очукуо.
Эрдэттэн билгэлэммэт успуорт көрүҥэ
Оҕунан ытыы эрдэттэн билгэлэммэт успуорт көрүҥэ. Бэл, тыал-салгын оонньооһунуттан уонна киһи уопсай туругуттан тутулуктаах. Тэрийээччилэр этэллэринэн, билигин төрүт оҕунан ытааччы ахсаана өрөспүүбүлүкэҕэ икки сыл анараа өттүгэр 400 эбит буоллаҕына, билигин ытааччы ахсаана 2,5 тыһ. кэриҥэ буолбут. Онтон, холобур, икки сыллааҕыта охчуттарга биир эрэ кулууп баар эбит буоллаҕына, билигин аҥардас Дьокуускай куоракка аҕыс кулууп баар. Төрүт оҕунан ытыынан дьарыктаныы киһи сааһыттан тутулуга суох. Киһи кыра сааһыттан дьарыктанан баран ситиһиилэнэр диэн буолбатах, киһи бу успуорт көрүҥэр хаһан баҕарар кэлиэн сөп, манна киһи сааһа, ыйааһына, тас көрүҥэ, ис туруга оруолу оонньообот. Күүстээх баҕа уонна дьарык эрэ наада.
Онтон оноҕос көтүүтүн транспорт ханнык көрүҥүн түргэнин кытары тэҥнээҕий? Видеороликка көрүҥ:
Суруйда Снежана ЯКОВЛЕВА.
Оператор, монтаж Авдей НЕУСТРОЕВ.
Кэрэспэдьиэннэр Снежана ЯКОВЛЕВА, Яна ГУЗАИРОВА, Стас Попов.
«Кэскил» оҕо пресс-киинэ.
keskil14.ru