Исидор Барахов аатын үйэтитиигэ Үөһээ Бүлүүгэ ССКП райкомун сэкэрэтээринэн (1955-58 сс.) үлэлии олорбут Гавриил Иосифович Чиряев улахан оруоллаах.
Ол курдук, архивка үлэлии сылдьан, Исидор Барахов туһунан хас да докумуон булан, онно олоҕуран аан бастаан оройуон хаһыатыгар редактор Базаровы кытта ыстатыйа суруйбута. Ыстатыйа аата «Исидор Никифорович Бараахап» (революционнай уонна общественнай-политическай үлэтэ). Ыстатыйата «Революция саллаата» рубрикаҕа тахсыбыта. Онтон кылгатыллан «Кыым» хаһыакка бэчээттэммитэ.
1957 сыллаахха Исидор Барахов сырдык аата тиллибитин кэннэ, биир сыл эрэ ааспытын кэннэ, Үөһээ Бүлүү бастакы нүөмэрдээх оскуолатыгар кини аатын бэрдэрбитэ. Оччолорго директорынан Дмитрий Спиридонович Спиридонов этэ.
Ити сыл Харбалаахха баар Хрущев аатынан холкуос И.Н. Барахов аатынан ааттанарыгар Гавриил Чиряев биир бастакынан этии киллэрбитэ. Оччолорго холкуос салайааччытынан Георгий Платонов үлэлии олорбута.
Гавриил Иосифович көрдөһүүтүнэн Василий Спиридонович Петров «Славный путь большевика» диэн И. Барахов олоҕун, үлэтин сырдатар брошюра 1961 с. тахсыбыта. Ол кэмҥэ кини обком уонна обком бюротун сэкэрэтээринэн талыллыбыт кэмэ этэ. Василий Петрович брошюратын киирии тылыгар Саха сирин обкомун партийнай архивын уонна политическай уонна научнай билии уопсастыбатын Саха сиринээҕи президиумун көрдөһүүтүнэн суруллубут диэбит.
Маны таһынан Москваҕа командировкаҕа бара сылдьан, Александра Андреевна Черепанова-Барахова уонна уола Ярослав Харбалаахтааҕы аймахтарын, Исидор Барахов бииргэ төрөөбүттэрин кытта билиһиннэрбит улахан өҥөлөөх.
Кини Исидор Барахов аатын эрэ үйэтитиигэ үлэлээбэтэҕэ. Гавриил Иосифович обком сэкэрэтээринэн олорон А.Е. Кулаковскай үбүлүөйүн ыытарга үгүс үлэни көрсүбүтэ. Саха интеллигенциятыгар Георгий Петрович Башариҥҥа, Авксентий Мординовка, бырааттыы Даниловтарга харыстабыллаахтык сыһыаннаһара. КПСС депутаттарынан кытта таллара сылдьыбыта бу кинилэри үрдүктүк сыаналыыра көстөр.
Гавриил Иосифович Чиряев Платон Алексеевич Ойуунускай реабилитацияламмытын кэннэ Степан Дадаскинов уонна композитор Николай Берестов Ойуунускай туһунан операны суруйар туһунан идеяларын олус биһирээбитэ. Максим Аммосов туһунан эмиэ музыкальнай айымньыны туруоруохха сөп диэн эбии эппитэ.
Ити курдук уһулуччу дьон аата тиллэригэр үгүс үлэни ыыппыт Киһи Гавриил Чиряев буолар.
Евдокия СЕМЕНОВА,
И. Барахов түмэл үлэһитэ.
keskil14.ru