Ыам ыйын 24 күнүгэр өрөспүүбүлүкэ бары оскуолаларыгар Тиһэх чуораан чугдааран, быйыл оскуоланы бүтэрээччилэри олох киэҥ аартыгар үктэнэр эппиэттээх күннэр үүммүттэрин биллэрдэ.
Н.Е. Мординов-Амма Аччыгыйын аатынан Харбалаахтааҕы үөрэхтээһин холбоһугар үс сүһүөҕү түмүктүүр кылаас үөрэнээччилэрин эҕэрдэлээһин буолла. 4-с кылаастары маҥнайгы кылаастан саҕалаан, ааҕарга-суруйарга, суоттуурга бэлэмнээн орто сүһүөххэ атаарда СӨ үөрэҕириитин туйгуна Т.С. Севастьянова. Тохсустарга олохторугар бастакы тургутугу ааһалларынан ситиһиилэри баҕардыбыт, кылаас салайааччыта Т.П. Слепцова.
Быйыл 11 кылааһы 8 оҕо бүтэрэр. «Бүтэһик чуораан» бырааһынньыга сүрүннээн кинилэргэ ананна. Бу кылааһы түөрт кэнники сылга салайан илдьэ сырытта СӨ үөрэҕириитин туйгуна В.П. Трофимова.
Тэрээһиҥҥэ кыттыыны ыллылар Ил Түмэн дьокутаата, ОАО Төлөн директора П.Д. Рахлеев, Таатта улууһун дьаһалтатын дьыалаҕа-куолуга салайааччыта Г.Г. Петров, үөрэҕирии салаатын начальнигын солбуйааччы И.И. Тарабукин, Орто Амма нэһилиэгин баһылыгын солбуйааччы А.И. Васильева.
Кинилэр орто оскуоланы бүтэрээччилэргэ кэс тылларын тиэртилэр, эҕэрдэлээтилэр. Үөрэхтээһин холбоһугун директорын эбээһинэһин толорооччу Л.А. Афанасьева экзамеҥҥа киирии бирикээстэрин ааҕан билиһиннэрдэ, оҕолор ситиһиилэрин туоһутун араас таһымнаах Грамоталары туттартаата.
Үөрүүлээх түгэнинэн үйэ аҥарын анараа өттүгэр оскуоланы бүтэрбит выпускниктар кэлэн эҕэрдэлээһиннэрэ буолла. Эҕэрдэ тылы РСФСР култууратын туйгуна И.В. Харлампьева эттэ уонна быйылгы үөрэх дьылын «Сыл бастыҥ үөрэнээччитигэр» оскуоланы бүтэрэр Ян Васильевка үбүлүөйдээх выпустар стипендияларын туттарда. Салгыы үгэс буолбут бүтэһик уруогу маҥнайгы учууталлара СӨ үөрэҕириитин туйгуна В.И. Винокурова кыра кылаастарга үөрэммит тэтэрээттэрин көрдөрөн, көрдөөх түгэннэрин санатыһан, олус истиҥник ыытта.
Киэһэтин «Быраһаай оскуола, быраһаай оҕо саас!» диэн олус интэриэһинэй тэрээһини «Орто Амма кэскилэ» түмсүү сарсыарда 6 чааска диэри иилээн-саҕалаан ыыттылар! Оскуола сылларын кэрэ кэмин санатар араас оонньуулары тэрийэннэр уһун түүнү билбэккэ да хааллылар. Олус астынан, тэрийээччилэргэ махтанан тарҕастылар. Учууталлар чааһынан быысаһан дьуһуурунайдаатылар.
Аны бу күннэргэ тиийэн кэлбит дьоһун тургутуктары, БКЭ-ни, этэҥҥэ ааһан, олох киэҥ аартыгар үктэнэр үөрэнээччилэрбитигэр ситиһиилэри баҕарабыт!
20 сыл оскуолабыт үөрэҕин чааһын бэриниилээхтик, олус эппиэтинэстээхтик салайар Евдокия Ивановна Седалищеваҕа «СӨ үөрэҕириитин туйгуна» бэлиэни бу дьоһун күҥҥэ туттарбыттарынан үөрэн, долгуйан туран, эҕэрдэлиибит! Өссө хорутуулаах, айымньылаах үлэни баҕарабыт!
Валентина Кривошапкина, Харбалаах, Таатта.
keskil14.ru