Ыам ыйын 5 күнүгэр оскуолабытыгар «Дьоһуннааҕы кэпсэтии» дьарык «Уруй буоллун Кыайыы күнэ! Өлбүт герой тиллэр күнэ!» диэн тиэмэҕэ ыытылынна. Аҕа дойду Улуу сэриитигэр Кыайыы 80 сылыгар анаммыт дьарык туһунан орто, улахан сүһүөх учууталларыттан, үөрэнээччилэриттэн санааларын иһиттим.
Любовь Ивановна Филиппова, VII кылаас салайааччыта:
– Ыам ыйын 5 күнүнээҕи «Дьоһуннааҕы кэпсэтии» дьарык «Уруй буоллун Кыайыы күнэ! Өлбүт герой тиллэр күнэ!» диэн тиэмэнэн ыытылынна. Дьарык сценарийа, ис хоһооно оҕолорго да, учууталларга да табыгастаах, олус үчүгэй диэн сыаналыыбын. Оҕолору кэпсэтиигэ көҕүлүүр. Дьарык матырыйаалын ис хоһооно баай. Бэйэбит нэһилиэкпит ветераннарын ахтан-санаан аастыбыт. Сценарий тутулунан дьарык «Тыыннаахтар умнубат сыллара» ырыанан саҕаламмыта оҕолору хара маҥнайгыттан дьарык туох туһунан буолуохтааҕар бэлэмниир. Дьарыкка туттуллар эбии матырыйааллар куйаар код нөҥүө ыйыллыбыттара табыгастаах. Маннык бэлэм сценарийдаах, тиэмэҕэ сөп түбэһэр дьарыгы «Кэскил» оҕо бэчээтин кыһата оҥорон таһаарара наһаа махталлаах.
Дайаана Протасова, VII кылаас:
– Ыам ыйын 5 күнүнээҕи «Дьоһуннааҕы кэпсэтиигэ» сөбүлээбитим диэн дьарык ырыанан саҕаламмыта буолар. Кыра эрдэхпиттэн ыллыыр, билэр ырыам дьарыкка киирбитин сөбүлээтим.
Комила Аржакова, Х кылаас:
– Бу дьарыктан ветераннар суолталарын туһунан үчүгэйдик өйдөөтүм. Мин бэйэм активиспын, онон миэхэ ити өйдөбүл көмөлөөх уонна туһалаах буолуо диэн эрэнэбин.
Анна Афанасьевна Романова, Х кылаас салайааччыта:
– Бу «Дьоһуннааҕы кэпсэтиигэ» мин үөррэнээччилэрбэр Улуу Кыайыыны кытта сибээстээх сүрүн өйддөбүллэри кэпсээтим. Ветераннар диэн кимнээҕин, туохха үөрэтэллэрий, биһиэхэ бу үүнэр көлүөнэҕэ туох суолталааҕын уонна Аҕа дойду Улуу сэриитин уопсай өйдөбүлүн быһааран, кэпсээн биэрдим. Киинэлэртэн кылгас быһа тардыылары, ветераннар кэпсээннэрин көрдүбүт.
Оҕолорум дьарыгы интэриэһиргээн, эбэлэрин, хос эбэлэрин, эһэлэрин туһунан кэпсээтилэр. Кыайыы күнүн көрсө дьоһуннаах кэпсэтии буолла диэн бары астынныбыт. «Кэскил» оҕо бэчээтин кыһата үөрэнээччи болҕомтотун, интэриэһин тардар ис хоһоонноох «Дьоһуннааҕы кэпсэтиини» оҥороллор.
Лилия МАРКОВА, VIII кылаас,
А.П. Илларионов аатынан Хайахсыт орто оскуолата, Чурапчы