Үс Герой дойдутугар Хаптаҕай нэһилиэгин оскуолатыгар сыл аайы ыытыллар “Sсhool fest — 2024” бэстибээл буолан ааста. Бастакы күн ырыа уонна дьиэ кэргэнинэн нүөмэрдэри көрүү буолла.
Ырыа күрэҕин түмүгэ: I миэстэ – 3, 8 кылаастар; II миэстэ – 1, 2, 4, 5, 10 кылаастар; III миэстэ – 6 кылаас. Гран-при – 7 кылаас.
Дьиэ кэргэн нүөмэрдэрин көрүүгэ оҕолор төрөппүттэрин кытта кыттыыны ыллылар.
1 кылаастарга Алеша Захаров ийэтинээн Виктория, аҕата Алексей Захаровтар кытыннылар.
2 кылаастарга Нарыйаана Дмитриева ийэтинээн Надеждалыын, аҕатынаан Иван Павловичтыын, эбэтинээн Екатерина Николаевналыын, эһэтинээн Павел Ивановичтыын ырыа ыллаабыттара, ону таһынан эбэтэ Екатерина Николаевна кийиитинээн дуэттаан көрөөччүлэри сөхтөрдүлэр.
3 кылаастарга Сандаара Давыдова ийэтинээн Нюргуйаана Николаевна, аҕата Иван Иванович буолан ыллаатылар, эбэлэрэ Прасковья Афанасьевна байааҥҥа доҕуһуоллаата.
4 кылаастарга Арина Готовцева ийэтинээн Туйаара Николаевналыын дуэттаатылар.
5 кылаастарга Дайаана Кычкина ийэтинээн Ирина Владимировна, убайа Айгылаан буоланнар хомуска, кырыымпаҕа сахалыы матыыптары оонньоон иһитиннэрдилэр.
6 кылаастарга Розанна Иванова ийэтинээн Оксана Григорьевналыын ыллаатылар.
7 кылаастарга Алена Семенова ийэтинээн Нюргуйаана Петровналыын хотугу үҥкүүнү толордулар.
8 кылаастарга Саша Ефремов ийэтин Ильяна Ильиничнаны, аҕатын Егор Ильиһы, эбэтэ Лена Николаевна Лукинаны кытта билиҥҥи олохтон сценка оонньоон көрдөрүлэр.
10 кылаастан Лера Готовцева ийэтинээн Евдокия Ивановналыын сахалыы үнкүүнү үҥкүүлээтилэр.
Бэстибээл иккис күнэ үҥкүү алыптаах күнэ буолла. Оҕолор сүрдээх үчүгэйдик бэлэмнэммиттэр, көстүүм бөҕөтө тиктибиттэр. Бииртэн биир хатыламмат нүөмэрдэри көрдүбүт.
Киһи сэргиирэ диэн кылаас оҕолоро ким да арыыланан хаалбакка, бары үҥкүүлээтилэр.
Онтон түмүк маннык буолла: Гран При – 1, 8 кылаастар. I миэстэ – 3, 4, 7 кылаастар; II миэстэ – 5 кылаас; III миэстэ – 2, 6, 10 кылаастар. «Бастын сценарическай көстүүм» номинация – 10 кылаас коллектива.
Кыайыылаахтар кубогынан, харчы бирииһинэн наҕараадаланнылар. Спонсордарбыт – нэһилиэк общественнай түмсүүлэрэ, тэрилтэлэрэ. Бэстибээл сыллата тупсан, таһыма үрдээн иһэрин дьүүллүүр сүбэ даҕаны, көрөөччүлэр да бэлиэтээтилэр.
Үҥкүүлэри туруобут, бэлэмнээбит хореограф Айталина Альбертовна Антоноваҕа, ырыалары бэлэмнээбит ырыа куруһуогун салайааччытыгар махталларын биллэрдилэр.
Василена ДМИТРИЕВА, Х кылаас, «Кустук» студия,
Кеша Алексеев аатынан Хаптаҕай орто оскуолата, Мэҥэ Хаҥалас