Муус устар 25 күнүгэр биһиги Ил Дархаммыт Айсен Сергеевич Николаев Өрөспүүбүлүкэ күнүн чэрчитинэн, үгэскэ кубулуйбут көрүҥүнэн, быһа лиинийэҕэ тахсан дьон-сэргэ биэрбит ыйытыыктарыгар хоруйдаата. Маны тэҥэ, Саха сирин сайдыытыгар сүрүн хайысхаларга бэйэтин санаатын үллэһиннэ.
Муус устар 19 күнүттэн өрөспүүбүлүкэ олохтоохторуттан 800-тэн тахса ыйытык, ону тэҥэ, 3 чаас устата барбыт быһа кэпсэтиигэ 1400 кэриҥэ ыйытыы киирбит. Мин, оскуола үрдүкү кылааһын үөрэнээччитэ буоларым быһыытынан үөрэҕириигэ уонна ыччакка сыһыаннаах этиилэри ордук интэриэһиргээн иһиттим. Ол курдук, ОГЭ, ЕГЭ туттарааччылар, онлайн нөҥүө Дьокуускай куоракка баар сыантыртан репетитор босхо консультациятын өҥөтүнэн туһаныахтарын сөбүн сэргээтим уонна биһирээтим.
Айсен Сергеевич оскуола үөрэнээччилэригэр аналлаах «Мин бастакы идэм» пилотнай бырайыак үлэлиэхтээҕин санатта. Бырайыак үс, ол курдук: Горнай улууһугар кэтэх хаһаайыстыба, Мэҥэ Хаҥаласка урбаан уонна Дьокуускайга креативнай индустрия хайысхаларынан барарын эттэ. Киирбит ыйытыкка эппиэттээн, оҕо бэйэтигэр дохуот киллэринэн, иллэҥ кэмигэр үлэлиирин утарбатын, төттөрүтүн биһириирин биллэрдэ, манна кини бэйэтин оҕотун холобур быһыытынан кэпсээтэ. Ону таһынан, бэйэм медиа эйгэни сэҥээрэр буоламмын, Саха сиригэр киинэ сайдыытыгар туһуламмыт кинопавильон үлэҕэ киириэхтээҕин олус астына иһиттим.
Ил Дархан хас биирдии оҕо Ийэ дойдутугар бэриниилээх буола улаатыахтааҕын, патриотическай өйгө-санааҕа иитиллиэхтээҕин тоһоҕолоон эттэ. Маны тэҥэ кини, ыччакка аналлаах араас тэрээһиннэр, холобур «Муус устар» бэстибээл ыччаты түмэрин, элбэх саҥа талааннары арыйарын чорботон бэлиэтээтэ. Айсен Сергеевич бэйэтин телеграм каналыгар Саха сирин олохтоохторугар быһа эпииргэ актыыбынай кыттыыларын иһин махтанарын биллэрдэ.
Айгыына Бурнашева, Лөгөй лиссиэй-интернат 11 кылааһын үөрэнээччитэ.