Эдэр бөҕөстөр дневниктэриттэн
Амма улууһун Эмис нэһилиэгин эдэр тустууктара Сеня Васильев, Дамир Солдатов, Матвей Тимофеев, Айгылаан Николаев, Алик Ноговицын, Даниель Петров, Семен Степанов, Алеша Захаров быйыл аан бастакытын кулун тутар-муус устар ыйдарга үс нэдиэлэ устата тренердэрин Аркадий Николаевич Тастыгины кытта Амурскай уобалас Тында, Благовещенскай куораттарыгар уһун кэмнээх сборга сылдьан кэллилэр.
Уолаттар айан, дьарык туһунан суруммут дневниктэриттэн
ааҕааччыларбытыгар билиһиннэрэбит.
23.03.2024. Мин бастаан тустууга кэлэрбэр чэпчэки дии санаабытым. Оннук буолбатах эбит. Төһө да күүстээх буол элбэх приему билбэт буоллаххына, кыайан тустубаккын. Билигин дьиэбиттэн ыраах кэлэн олоробун. Тындаҕа сборга кэллибит. Тында Амурскай уобалас куората. Аллараа Бэстээхтэн поеһынан айаннаан кэллибит.
Кулун тутар 21 күнүгэр мин олохпор саамай умнуллубат күн буолан ааста. “Надежда БАМа” диэн Россия турнирыгар 52 кг туһуннум. Бастакы миэстэ буоллум. Мэтээл, Кубок уонна термос биэрдилэр. Наһаа үөрдүм. Өттүк прием көмөлөстө дии саныыбын. Дьиэбэр кубоктаах төннөр буоллум. Астык. Тустуунан дьарыктанар буолан, атын сирдэри көрө, кэрийэ сылдьабын. Тында кэнниттэн Благовещенскай куоракка барабыт.
Тындаҕа уопсайга олоробут. 2Гис хайдах туттарга үөрэнним, биллим. Благовещенскай улахан куорат эбит. Кытай бу көстөн турар. Ыраас куорат. 7-с этээскэ олоробут.
Сеня Васильев, V кылаас
Элбэх приему биллим. Перевод, таас эрийии, төбө эрийии, атахха киирии, прогиб, мельница, кочерга. Тустууга очко, балл хайдах ааҕылларын эмиэ биллим. Утарсааччыгын түөһүн баттаан забегания оҥордоххуна 2 балл ааҕыллар. Атахха киириини элбэхтик оҥордум. Хонноҕун анныттан ылан прогибка киириини сатаан эрэбин.
Айгылаан Николаев, VI кылаас
***
28.03.2024. Артем диэн уоллуун үлэлээтим. Биир оҕону күлүүстээн тушеҕа уурдум. Кочерга диэн уҥа илиигин хонноҕор уган баран, илиитин кытта холбуугун уонна быраҕаҕын. Атаххын көмүскэнэҕин. Илиитин хонтуруоллуугун. Аллараа батыыгын илиигин төбөтүн анныгар илдьэҕин уонна анньаҕын.
Эбиэккэ столовойга аһаатыбыт. Борщ, рис, котлет сиэтим.
30.03.2024 Бүгүн аквопааркаҕа сырыттыбыт. Баанньыктанныбыт. Дьиэбитигэр таксинан 230 солк. кэллибит. Мини маркекка сылдьыбыппыт.
Алеша Захаров, IV кылаас
26.03.2024. Благовещенскай куоракка 9.45 кэллибит. Дьиэбитин буллубут. 4 ч. дьарыкка бардыбыт.
28.03.2024. Бүгүн 7 ч турбуппут. 8.20 дьарыкка барбыппыт. Приемнарбытын оҥордубут.
28.03.2024. Благовещенскай куоракка баарбыт. Сарсыарда 7 чааска подъем, 7.20 сарсыардааҥҥы аһылык. 8 ч. дьарыкка бардыбыт. Онно сүүрэбит, сэрээккэлиибит, приемнарбытын оҥоробут. Үлэлиибит. Кочерга. Төбөбүтүн саннытыгар уурабыт, хаҥас илиибитин хонноҕун анныгар угабыт, утарсааччы илиитин ылабыт, бэйэбит диэки тардабыт, тобукпутун токурутабыт уонна ылан быраҕабыт. Мельница. Илиитин ылабыт, тобукпутун токурутабыт, атаҕыттан ылабыт, санныбыт нөҥүө ылан көбүөргэ быраҕабыт. Өттүк. Уҥа илиибитинэн атаҕын тутабыт, хаҥас илиибитинэн саннын, биир атахпыт тобуктуур, биир атаҕын тутан тардабыт. Защита от ног. Бу приему сопернигын атахха киирэрин саҕана тоҥолоҕуттан тутан ылан оҥороҕун.
Сеня Васильев, V кылаас
29.03.2024. Дьарык 16.00. Приемнарбытын хатылаатыбыт. Куврок вперед, стойки на мост, забегание оҥордубут. Хаҥас өттүгэр биэстэ, иннигэр-кэннигэр ыстанныбыт.
30.03.2024. Бүгүн Амматтан төрүттээх тустууктар туһунан үөрэтэбит. Василий Петрович Уваров туһунан суруйдум. Кини кулун тутар 19 күнүгэр 1949 с. Эмискэ төрөөбүтэ. 1965 с. Эмис оскуолатын бүтэрбит. Василий Петрович кэргэнэ эмиэ Эмис. Ектерина Дмитриевна Уварова диэн. Василий Петрович өрөспүүбүлүкэҕэ, ону ааһан Россияҕа, тас дойдуларга тиийэ биллэр тренер. Василий Петрович Саха сиригэр көҥүл тустууга хас эмит көлүөнэ ыччаты, улахан буукубаттан суруллар спортсменнары иитэн таһаарбыт.
Айгылаан Николаев, VI кылаас
01.04.2024. Дьарык кэнниттэн Амма тустууктарын туһунан суруйабыт. Алексей Петрович Пахомов ССРС спордун маастара, үрдүк юридическай үөрэхтээх, юстиция полковнига. Саха сиригэр биллэр үлэлээх юрист эбит. Эдэр сылдьан ССРС Сэбилиниилээх күүстэрин чемпиона, призера, Бүтүн Союзтааҕы турнирдар призердара, кыайыылааҕа.
Василий Прокопьевич Неустроев Амма чемпиона уонна Саха республикатын чемпиона. Спорт маастара. Россияҕа иккис миэстэлээх. Саха республикатын главнай тренерэ.
Соловьев Виктор Афанасьевич көҥүл классическай тустууга, хапсаҕайга спорт маастара. Бүлүү улууһугар тренеринэн үлэлиир.
Прокопий Неустроев
01.04.2024. Биир дойдулаахтарбыт биллэр тустууктар туһунан ааҕан биллибит. Мин бу Герман Устинов туһунан суруйа олоробун. Кини Дмитрий Коркин турнирын кыайыылааҕа, 70 киилэҕэ диэри ыйааһыҥҥа. Финалга “лаампа” диэн албаһынан биэстэ эргитэн Армения бөҕөһүн 11:0 ахсааҥҥа кыайбыт.
Владимир Егоров. Кини Амма улууһун Бөтүҥ нэһилиэгиттэн төрүттээх. Н.Захаров-Сахаачча аатынан Амматааҕы оҕо спортивнай оскуолатыгар эрчиллибит.
Алик Ноговицын, II кылаас
01.04.2024. 60 отжимание оҥордум. 60 пресс хачайдаатым. 50-100 шпагат-волна оҥордум. Приемнары отработкалаатым 2 мүн. Защита от ног хатылаатым. Утарсааччым атахха киирдэ, отбрасывание уонна кэннигэр тахсан хааллым.
Михаил Степанович Скрябин туһунан биллим. Кини Амма Абаҕатыгар 1955 с. муус устар 7 күнүгэр күн сирин көрбүт. 1970 с. Чурапчыга Дмитрий Петрович Коркиҥҥа үөрэммит. Училищены бүтэрбит. Биир сыл Дмитрий Петрович Коркины кытта үлэлээбит. 1973 с. Минскэйдээҕи физкультура уонна спорт институгар үөрэммит. 1978 с. тренер быһыытынан Минскэйгэ СДЮШОР-га үлэтин саҕалаабыт. Ол сыл күһүнүгэр армяиҕа барбыт. 1980 с. Саха сиригэр төннөр. ШВСМ-ҥа тренердээбит. 1985 с. Аммаҕа оҕо спортивнай сокуолата аһыллыаҕыттан төрөөбүт дойутугар үлэлээбит. Амма улууһун тустуук спортсменнарын ситиһиилэрэ Михаил Степановиһы кытта сибээстээхтэр эбит. 2004 с. Чурапчытааҕы физкультура уонна спорт институтугар тренерынан анаммыт. Михаил Степанович Скрябин билигин биһиги ортобутугар суох. Кини Илья Анатольеви Солдатов тренерэ эбит.
Сеня Степанов, VIII кылаас
02.04.2024. Утуйан турдубут. Сууннубут. Аһаан баран хомунан дьарыкка бардыбыт. Дьарык разминкаттан, приемнары отработкаттан саҕаланар. Напарниктарбытын кытта үлэлиибит. Мин биирдэ туше уурбутум. Онтон кини эмиэ миигин туше уурбута. Ыйааһыным 40 кг. 94 гр. этэ. Билигин 40 кг. 10 гр. Буолбут. 840 гр түһэрбиппин. Эбиэттэн киэһэ эмиэ дьарык. Зарядка, растяжка. Стойкаҕа үлэлээтибит.
Дамир Солдатов, VI кылаас
***
08.04.2024. 50-на тардынным, 100 отжимание, 100 приседание оҥордум. Пресс хачайдааһыныгар эмиэ 100 оҥордум.
Даниэл Петров, II кылаас
Уһун кэмнээх сборга сылдьан тугу ситистиҥ, Благовещенскайга “Содружество” Россия турнирыгар тугу кыайбатыҥ, туох түмүккэ кэллиҥ?
09.04.2024. Утарсааччым атахха киирбитигэр атахпын отбрасываниены кыайан оҥорбутум. Ол иһин бэйэҥ атаакалыахтааххын. Партерга үлэлиир буоллум.
Матвей Тимофеев, V кылаас
***
09.04.2024. Атаакалыыр буоллум. Атахха киирэргэ үөрэнним.
Алик Ноговицын, II кылаас
***
09.04.2024. Миэхэ опыт, техника суох этэ. Атахха киирбитигэр отбрасывание кыайан оҥорботум. Дьарык наһаа боростуой буолбатах эбит. Элбэхтик үлэлиэххэ наада. Биһиги Эмис сборнай хамаандата буолабыт. Онон инникитин кыайар эбээһинэстээхпит.
Сеня Васильев, V кылаас
***
09.04.2024. Утарсааччым захват ылан атакалыыр. Стойкаҕа, партерга упражнениелары биллим. Дьарыкка сылайабын. Бу сбор миэхэ туһалыаҕа. Эбилинним.
Прокопий Неустроев
***
09.04.2024. Атакалыыр приему оҥорбутум. Стойкаҕа үөрэнним, партерга эмиэ. Элбэҕи биллим, эбилинним.
Дамир Солдатов, VI кылаас
***
09.04.2024. Приемнары үчүгэйдик билбэппин. Стойкам тирэҕэ суох. Бу дьарык кэмигэр элбэх приему биллим. Дьарыктар күүскэ аастылар. Муус устар 13 күнүгэр буолар турнирга мин бэлэммин. Бэйэбэр эрэллээхпин.
Сеня Степанов, VIII кылаас
***
09.04.2024. Стойкам аһаҕас. Стойкаҕа тирэҕэ суохпун. Бу сборга элбэҕи эбилинним.
Матвей Тимофеев, V кылаас
***
09.04.2024. Атахпын кыайан отбрасываниелаабатым. Элбэх приемнары биллим. Дьарык улахан үлэ буоларын биллим. Эбилинним аҕай. Күрэхтэһиигэ бэлэммин.
Даниэл Петров, II кылаас
***
09.04.2024. Мин көбүөргэ киирээри туран куттанарым суох буолла. Күүстээх дьарыгы аастым. Саҥа сири, атын дьону көрдүм. Ол миэхэ үчүгэй, туһалаах
Эрхан Катаев
***
Эмис эдэр тустууктар уһун кэмнээх бастакы улахан сбордарын туһунан
Матвей Тимофеев маннык кэпсиир:
– Мин тустууну бэйэм сөбүлээн тураммын бу секцияҕа киирбитим. Тренербит Аркадий Николаевич Тастыгин сүбэлээн элбэҕи көмөлөһөр. Тындаҕа, Благовещенскай куоракка үс нэдиэлэ устата дьарыкка сырыттыбыт. Тындаҕа уопсайга олорбуппут, оттон Благовещенскайга квартираҕа олордубут. Аспытын бэйэбит астанабыт. Иһиппитин, таҥаспытын эмиэ бэйэбит суунабыт. Дьуһуурустубалыыбыт. Сарсыадааҥҥы аһылыгы тренербит бэлэмниир. Миин, ыһаары буһарабыт. Аһы сатаан астыыр буоламмын үчүгэй. Ити өттүгэр хамаандабар элбэҕи туһалаатым дии саныыбын. Дьиэбиттэн аан бастаан ыраах тиийэ сырыттым. Суох кэммэр индюктарым улааппыттар аҕай. Хайдах эрэ миигин ахтыбыт курдуктар. Элбэх музейга сырыттыбыт. Хотугу норуоттар музейдарыгар сылдьан эбэҥки норуотун көстүүмүн кэтэн көрдүбүт, хаартыскаҕа түстүбүт. Аквопааракаҕа сылдьан сөтүөлээтибит. Поеһынан айаннаатыбыт. Улахан куоракка таксинан айанныы үөрэннибит. 2ГИС туһанар буоллубут. Элбэх приему биллим. Тустууга приема билбэт буоллаххына, сатаан тустубаккын эбит. Хамаанда билигин саамай улахан сыала – Эмискэ буолар Илья Анатольевич Солдатов турнирыгар олох үчүгэйдик кыттыахтаахпыт. Мин инники өттүгэр атын куораттарга сборга өссө да барыам этэ. Сөбүлээтим.
