Муус устар 2 күнүгэр «Чурапчы» тыа хаһаайыстыбатын производственнай кооперативын бэрэссэдээтэлэ Николай Ильич Петров уонна кооператив кылаабынай технолога Виктория Никифоровна Лазарева Хайахсыт нэһилиэгин олохтоохторун кытта көрүстүлэр. Тыа хаһаайыстыбатын бородууксуйатын оҥорон таһаарар кооператив үлэтин туһунан билиһиннэрдилэр, боппуруостарга эппиэттээтилэр.
2024 сылга Хайахсыт нэһилиэгэ үүтү туттарыыга 212,4 тонна былааннаах. Быйыл «Чурапчы» кооператива биир киилэ үүтү 80 солк. туттар буолбут. Мантан 65 солк. тыа хаһаайыстыбатын Министиэристибэтиттэн көрүллэр, онтон 15 солк. «Чурапчы» ТХПК-та бэйэтэ уган биэрэр. Быйыл үлэлиир усулуобуйаны тупсарыыга улахан болҕомто ууруллан, үүт собуоттарын күөх төлөн уотугар холбооһун былааҥҥа киирбит.
Мунньах кытыылаахтара «Чурапчы» ТХПК оҥорон таһаар бородууксуйалара нэһилиэктэргэ атыыга тоҕо кэлбэтин туһунан интэриэһиргээтилэр. Кооператив салалтата «бу боппуруоһу болҕомто киинигэр ылан быһаарыахпыт» диэн хоруйдаата.
Олохтоохтор биһиги нэһилиэкпитигэр үүт собуотугар сыыр оҥоһуллуон сөп дуу диэн ыйыттылар. Онуоха эппиэт ис хоһооно маннык буолла: сыыр оҥоруутугар олус үчүгэй хаачыстыбалаах, салгыны көрбөтөх үүт, анал буһарар оһохтор наадалар. Билиҥҥи туругунан, Хайахсыт собуотугар сыыр оҥоһуллар усулуобуйата суох эбит.
Соторутааҕыта буолан ааспыт «Чурапчы» ТХПК салалтатын мунньаҕын туһунан интэриэһиргээтилэр. Бу мунньахха коопертив үлэтин кэҥэтэр, «Саха АГРО продукт» диэн өрөспүүбүлүкэ биир улахан тэрилтэтин суохтаппат гына үлэни тэрийэр наадатын туһунан кэпсэппиттэр.
Түмүккэ Николай Ильич мунньахха кыттыыны ылбыт дьоҥҥо махталын билэрдэ. Элбэх киһи кэлбит диэн астыммытын биллэрдэ.
— Сүөһү иитиитигэр эдэр ыччаты угуйуҥ, үөрэтиҥ, сыһыарыҥ! Саха омук төрүт дьарыгын умнумуоххайыҥ. Тыа хаһаайыстыбата баар буоллаҕына биһиги улууспут, нэһилиэктэрбит тупсуохтара , сайдыахтара диэн бигэ эрэллээхпин, – диэн санаатын эттэ.
Вадим КОЛЕСОВ, Х кылаас, А.П. Илларионов аатынан Хайахсыт орто оскуолата,
Чурапчы.