Бүгүн Россиятааҕы Устудьуоннар күннэригэр мин эбэбиттэн Александра Спиридоновна Прокопьеваттан устудьуоннаабыт сылларын туһунан кэпсииригэр көрдөстүм.
Эбэм Александра Прокопьевна маннык диэн кэпсээтэ:
— Исидор Бараахап аатынан орто оскуоланы 1971 с. бүтэрбитим. Онтон 3 сылынан Тамалакаан нэһилиэгэр фермаҕа доярканан үлэлээбитим. «Школа-производство-вуз» диэн девиһынан комсомол путевкатынан тахсыбытым. 1974 с. Благовещенскай пединститутка физмат факультетка киирбитим. Онтон 1979 с. үөрэхпин бүтэрэн математик идэтин ылан Үөһээ Бүлүү Ороһу оскуолатыгар үлэлии кэлбитим.
![](https://keskil14.ru/wp-content/uploads/2023/01/WhatsApp-Image-2023-01-23-at-20.09.37-1.jpeg)
Устудьуоннаабыт сылларым олоҕум биир кэрэ кэмнэрэ буолбуттара. Элбэх саха үөрэммитэ. Мин үөрэммит группабар 3 саха этибит. Уопсайга олорбуппут, хоспутугар 6 саха кыыһа олорбуппут. Олус иллээх этибит. Общественнай үлэҕэ кыахпытынан кыттарбыт, үөрэхпитигэр кыһаллан үөрэнэрбит, субуотаҕа театрдарга сылдьарбыт, сыл аайы саас сахалар мустан Зея өрүс кытыытыгар Ыһыах тэрийэн оонньоон-көрүлээн көрсөөччүбүт. Бииргэ устудьуоннаабыт кыргыттарбын кытта билигин да билсэбин.
Ванесса Прокопьева, «Тымтык» эдкорпост, Ороһу.
1