Устудьуон күнүгэр аналлаах ыйытык

Тохсунньу 25 күнүгэр Россияҕа Устудьуоннар күннэрэ бэлиэтэнэр. Оттон үрдүк, орто үөрэх кыһаларыгар үөрэнэ сылдьар устудьуон табаарыстарбыт олохторун туһунан кинилэр кырачаан бырааттара, балыстара туох санаалаахтарын билээри маннык ыйытыктары биэрдибит.

1. Эн санааҕар университекка туохха үөрэтэллэрий?
2. Устудьуон диэн кимий?
3. Оскуола үөрэнээччитититтэн студент туох уратылааҕый?
4. Стипендия диэн тугуй?
5. Эн улааттаххына устудьуон буолуоҥ дуо? Ханна үөрэниэххиний?
6. Үөрэнэ сылдьар устудьуоннарга тугу баҕарыаҥ этэй?

Онон Орто Халыма улууһун Өлөөкө-Күөл орто оскуолатын 5-6 кылааһын үөрэнээччилэрин хоруйдарын билсиҥ:

Сааскылаана Бубякина 5 кылаас:

1. Мин санаабар, университекка бэйэҥ талбыт идэҕин үөрэтэллэр.
2. Устудьуон диэн оскуоланы бүтэрбит үөрэххэ үөрэнэр оҕо.
3. Оскуола үөрэнээччитэ оскуолаҕа 11 сыл үөрэнэр, оттон студент 2-3, эбэтэр 5 сыл үөрэнэр. Уопсайга олорор.
4. Стипендия диэн государство студеҥҥа төлүүр харчыта.
5. Мин улааттахпына устудьуон буолуом. Дьокуускайга ХИФУ инженер-строительга үөрэниэм.
6. Устудьуоннарга үөрэхтэригэр ситиһиини баҕарабын, үөрэхтэрин бүтэрэн идэлэринэн үлэлээтиннэр, үчүгэй дьон буоллуннар.

Аполлон Винокуров 5 кылаас:

1. Мин санаабар, университекка үрдүк үөрэҕи үөрэтэллэр, онно ыарахан задаачалары суоттууллар.
2. Устудьуон диэн БКЭ туттаран, оскуоланы бүтэрэн, үөрэнэ барбыт киһи.
3. Оскуолаҕа ааҕаллар. Суоттуулар, оттон устудьуоннар идэҕэ үөрэнэллэр.
4. Стипендия диэн университеты бүтэрдэххинэ биэрэр харчылара.
5. Устудьуоннуом. Повар идэтигэр үөрэниэм.
6. Үөрэхтэригэр ситиһиини баҕарабын.

Эмилия Заболоцкая 5 кылаас:

1. Университекка талбыт үөрэххэр үөрэтэллэр.
2. Устудьуон диэн оскуоланы бүтэрбит, үрдүк үөрэххэ үөрэнэ сылдьар киһи.
3. Оскуола үөрэнээччитэ диэн төрөппүттэрин кытта олорон үөрэнэр оҕо, кини төрөппүттэригэр ииттэрэн олорор, оттон устудьуон диэн бэйэтин бэйэтэ бас билинэр эдэр киһи.
4. Стипендия диэн үчүгэйдик, туйгуннук үөрэнэххинэ бэриллэр харчы.
5. Мин улааттахпына устудьуон буолуом. Ырыаһыт идэтигэр үөрэниэм.
6. Устудьуоннарга туйгун үөрэҕи уонна дьолу-соргуну баҕарабын.

Айнура Захарова 5 кылаас:

1. Университекка араас идэҕэ үөрэтэллэр. Ол талбыт идэҕин хайдах сатыырга.
2. Устудьуон диэн орто оскуоланы бүтэрэн баран, атын үөрэххэ киирбит оҕо.
3. Үөрэнээччи орто оскуолаҕа үөрэнэр, оттон устудьуон университекка, эбэтэр колледжка үөрэнэр.
4. Стипендия диэн үчүгэйдик үөрэннэххинэ биэрэр харчылара.
5. Мин студент буолуоҕум. Ас астааччы  идэтигэр үөрэниэм этэ.
6. Устудьуоннар үчүгэйдик үөрэнэн стипендия лаах буоллуннар.

Арсен Пономарев 5 кылаас:

1. Университекка талбыт идэни үөрэтэллэр.
2. Устудьуон диэн аттестаты ылан, үөрэххэ киирбит киһи.
3. Оскуола үөрэнээччитэ уопсайга олорбот, стипендия ылбат, дьиэтигэр төрөппүттэрин кытта олорор. Оттон устудьуон 2-5 сыл үөрэнэр, уопсайга олорор.
4. Стипендияны государство биэрэр.
5. Устудьуоннуом. Полиция идэтигэр үөрэниэм.
6. Устудьуоннарга үрдүк ситиһиини баҕарыам этэ.

Люба Еремеева 6 кылаас:

1. Мин санаабар, университекка элбэх идэҕэ үөрэтэллэр.
2. Устудьуон диэн 11-с кылааһы бүтэрэн, БКЭ туттаран, аттестаты ылан улахан куораттарга үөрэнэр киһи.
3. Устудьуон идэҕэ үөрэнэр, оттон үөрэнээччи ааҕарга-суоттуурга.
4. Стипендия диэн харчы.
5. Мин улааттахпына, устудьуон буолуом, быраас идэтигэр үөрэниэм.
6. Устудьуоннар үөрэхтэрин үчүгэйдик бүтэрдиннэр.

Арылхан Винокуров 6 кылаас:

1. Университекка үлэҕэ киирэргэ, харчыны сатаан туһанарга үөрэтэллэрэ буолуо.
2. Устудьуон диэн БКЭ туттаран, аттестаты ылан үөрэххэ киирбит киһи.
3. Оскуола үөрэнээччитэ үлэ хайдаҕын уонна харчыны хайдах туһанары билбэт, оттон устудьуон үлэни-хамнаһы билэр.
4. Мин санаабар, стипендия диэн үчүгэй үөрэхтээхтэргэ бэриллэр.
5. Мин баҕар студент буолуом. Улаатан истэхпинэ, санааларым баҕар уларыйыахтара. Студент буоллахпына, харчыны сатанан туһанарга үөрэниэм этэ.
6. Устудьуоннарга үчүгэй санаалары, үрдүк ситиһиилэри, экзаменнарын ситиһиилээхтик туттаралларын баҕарабын. Кэлэн иһэр устудьуоннар күннэринэн эҕэрдэлиибин.

Элеонора Сухомясова 6 кылаас:

1. Мин санаабар, университекка быраабылалары үөрэтэллэр.
2. Оскуолатын бүтэрэн, үөрэххэ туттарсыбыт киһи устудьуон аатын ылар.
3. Оскуолаҕа араас предметтэри үөрэтэллэр, оттон устудьуоннар талан ылбыт эрэ идэлэригэр үөрэнэллэр.
4. Стипендия диэн устудьуоннуу сырыттаххына биэрэр харчылара.
5. Устудьуон буолан быраас идэтигэр үөрэниэм этэ.
6. Үөрэнэ сылдьар устудьуоннарга кытаанах доруобуйаны баҕарыам этэ.

Эрхан Созонов 6 кылаас:

1. Университекка үрдүк үөрэххэ үөрэтэллэр.
2. Устудьуон диэн оскуоланы бүтэрэн аттестат ылан үөрэххэ киирбит киһи.
3. Үөрэнээччи оскуолаҕа үөрэнэр, оттон студент талбыт идэтигэр.
4. Стпипендия диэн төһө үчүгэйдик үөрэммиккиттэн тутулуктаах харчы.
5. Мин улааттахпына электрик идэтигэр үөрэниэм.
6. Үөрэнэ сылдьар устудьуоннарга элбэх харчыны, үчүгэй үөрэҕи, бигэ доруобуйаны баҕарыам этэ.

Изольда Слепцова 6 кылаас:

1. Университекка элбэх билиини биэрэллэр, үлэҕэ киирэргэр наадалаахха үөрэтэллэр.
2. Устудьуон диэн оскуолатын бүтэрбит, аттестаты ылан талбыт үөрэҕэр үөрэнэр киһи.
3. Оскуолаҕа өйү сайыннараллар. Оттон устудьуоннуурга идэҕэ үөрэтэллэр.
4. Устудьуоннуурга бэриллэр харчы.
5. Мин устудьоуннаатахпына үөрэхпэр кыһаллыам.
6. Үөрэхтэрин кичэйдиннэр, үчүгэй үлэлээх буоллуннар.

Мирослав Винокуров 6 кылаас:

1. Университекка устудьуоннары бэйэлэрэ талан ылбыт идэлэригэр үөрэтэллэрэ буолуо.
2. Устудьуон диэн оскуоланы бүтэрэн, аттестаты ылан үөрэххэ баран үөрэнэр киһи.
3. Оскуола үөрэнээччитэ оскуолаҕа үөрэнэр, оттон устудьуон университекка, эбэтэр колледжка үөрэнэр.
4. Стипендияны үчүгэй үөрэхтээх устудьуоҥҥа биэрэллэр.
5. Улааттахпына устудьуон буолуом. МЧС үөрэҕэр туттарсыам.
6. Дьолу, үчүгэй үөрэҕи баҕарыам этэ.

Денис Винокуров 6 кылаас:

1. Университекка высшай математиканы үөрэтэллэр.
2. Устудьуон диэн аттестаттаах, удостоверениялаах, страховкалаах киһи.
3. Үөрэнээччи уонна устудьуон саастарынан араастаахтар.
4. Стипендия диэн университекка экзаменнаргын үчүгэйдик туттардаххына биэрэллэр.
5. Улааттахпына устудьуон буолан, программист идэтигэр үөрэниэм.
6. Устудьуоннарга миигиннээҕэр өйдөөх уонна күүстээх буолалларыгар баҕарабын.

Игнат Винокуров 6 кылаас:

1. Мин санаабар, университекка оҕолору араас идэҕэ хайдах үлэлииргэ үөрэтэллэрэ буолуо.
2. Устудьуон диэн оскуоланы бүтэрэн, аттестат ылан, үөрэнэ сылдьар киһи.
3. Устудьуон диэн университекка, эбэтэр колледжка үөрэнэр эдэр киһи, оттон үөрэнээччи оскуола оҕото.
4. Стипендия диэн үөрэххин үчүгэйдик туттардаххына биэрэллэр.
5. Улааттахпына устудьуон буолуом. Программист идэтигэр үөрэниэм.
6. Доруобуйаны, дьолу-соргуну, үчүгэй үөрэҕи баҕарабын.

И. Ноговицына,

Орто Халыма, Өлөөкө-Күөл б.