Аллараа Бэстээхтээҕи Тырааныспар техникумугар V өрөспүүбүлүкэтээҕи «Мин идэм-IT» —2020 күрэх сүүмэрдиир түһүмэҕэ буола турар. Былырыын 7 хамаанда кыттыбыт буоллаҕына, быйыл 15 хамаанда баар. Ити күрэх суолтата улаатарын туоһулуур. Кыттааччылар тус-туспа остуолга олорон бырайыактарын оҥороллор. Бииртэн-биир саҥа идиэйэ, саҥа көрүү «төрөөн» иһэр… Бары өттүнэн аныгы олоххо эппиэттиири, норуокка дьиҥ-чахчы олус туһалааҕы толкуйдаабыт кыайыылаах тахсар.
Тэрээһини СӨ Инновация, цифровой сайдыы уонна инфокоммуникационнай технология министиэристибэтиттэн М.Ю. Егасов, СӨ Үөрэх уонна наука министиэристибэтин иһинэн общественнай сэбиэт бэрэссэдээтэлэ, биологическай наука доктора М.М. Черосов, Мэҥэ Хаҥалас улууһун баһылыгын солбуйааччы В.В. Птицын, улуустааҕы үөрэх салалтатыттан А.А. Варфоломеева, «АК Железные дороги Якутии» испэсэлииһэ И.С. Иванова, Айылҕа харыстабылын бэрэссэдээтэлэ А.А. Петров үөрүүлээх быһыыгак-майгыга арыйдылар, оҕолорго ситиһиини баҕардылар. Хамаандалар үлэлиир кэмнэригэр FY IT-холбоһук маркетолога С.А.Егоров, дизайнер А.К. Сыромятников, Soft Way хампаанньаттан А.Нь.Тимофеев, М.К. Аммосов аатынан ХИФУ студена Дь.С.Афонскай сүбэ-ама, мунаахсыйар түгэннэргэ ыйан-кэрдэн биэрдилэр.
Мичил Стручков, СӨ IT салаатын ассоцияциятын бэрэссэдээтэлэ, «Якутия технопарк» сүрүннүүр эксперэ:
— Быйыл биһиги 16 улууһу кэрийэн, сүүмэрдиир түһүмэхтэри ыытыахтаахпыт. Ол туһунан сиһилии https://mp-it.ru/ саайтка билсиэххитин сөп. Бастакы тэрээһиммит Аллараа Бэстээххэ ыытылла турар. Бу күрэххэ эдэр ыччат араас IT уобалаһыгар, программнай сыһыарыыларга айа-тута үөрэнэр, идэтин таларыгар олугун оҥостор. Манна оскуола үрдүкү кылааһын үөрэнээччилэрэ, устудьуоннар кытталлар. Оҕолор «ECO case», «Транспортно-логистический узел», «Комфортная среда» хайысхаларынан мобильнай сыһыарыы, сайт оҥорон көмүскүүллэр. Бу түмүгүнэн кыайыылаахтар финалга тахсаллар. Онно бастаабыт оҕолор үөрэххэ быһа киирэр кыахтаналлар. Холобур, былырыын М.А. Бонч-Бруевич аатынан Санкт-Петербургтааҕы государственнай телекоммуникация университетыгар анал миэстэ баара.
Аллараа Бэстээх 1 №-дээх орто оскуолатын хамаандата:
— Биһиги бу күрэххэ «Өйдөөх оптуобус» диэн мобильнай сыһыарыы оҥоруохпут. Маннык бырайыак Дьокуускайга уонна да атын куораттарга номнуо баар эрээри, биһиги бөһүөлэкпитигэр суох. Дьон бары Аллараа Бэстээҕинэн ааһан иһэн, биир уһун уулусса эрэ баар курдук көрөллөр. Оннук буолбатах. Бөһүөлэк олус улахан, киэҥ. Сотору кэминэн оптуобустар өҥөлөрүнэн туһанар буолуохпут диэн эрэнэбит. Онно бу мобильнай сыһыарыы дьону-сэргэни абырыа этэ.
В.П.Ларионов аатынан Майа 1 №-дээх орто оскуолатын хамаандатын кыттааччылара:
— Аныгы кэм оҕото төлөпүөҥҥэ күнүн улахан аҥаарын атаарар. Буолары-буолбаты “хачайдаан” оонньуур. Итини хайдах эрэ туһаҕа таһаарар сыалтан оонньуу толкуйдаатыбыт. Онтубут олоҥхо курдук ис хоһоонноох буолар. Билигин олоҥхону ким ааҕыай? Суох буоллаҕа. Онон, саатар оонньуу нөҥүө биллиннэр ээ. Сүрүн дьоруой – Ньургун. Кини абааһы бухатыырдарыттан таптыыр кыыһын быыһыыр. Интэриэһинэй буолуо дии саныыбыт.
Марк Соловьев, И.Г.Тимофеев аатынан Майа лицейин XI кылааһын үөрэнээччитэ:
— Мин бу күрэххэ иккис төгүлүн кыттабын. Хамаандабар программист быһыытынан үлэлиибин. Кыра эрдэхпиттэн көмпүүтэргэ сыстаҕаспын. Онон олохпор программист идэтин таларбар «Мин идэм-IT» күрэх улахан суолталаах. Былырыын Майа сэлиэнньэтин иһинэн үлэлиир «Доставка еды» мобильнай сыһыарыыны оҥорбуппут. Быйыл хайысхабытын уларытан экологияны таллыбыт.
Мария Захарова, Мария Васильева, Аллараа Бэстээх 2 №-дээх орто оскуолатын XI кылааһын үөрэнээччилэрэ:
— Биһиги хамаанда быйыл эмиэ иккис кыттыыбыт буолар. Былырыын оскуолаҕа бириэмэни тутуһан бэйэтэ холбонор “чуорааны” (звонок) толкуйдаабыппыт. Араас муусуканы, ырыаны тыаһатыан сөп. Бу бырайыакпыт олоххо киирбитэ. Учууталлар, үөрэнээччилэр олус сөбүлээбиттэрэ. Билигин оҥорор үлэбит — симкалаах моойторук. Дьиэ сүөһүтэ эбэтэр ыт, куоска кэтиэн сөп. Оччотугар кинини сибээс хабар сиригэр сүтэрбэккин. Кэлин бырайыагы тупсаран, сибээһэ да суох сиргэ хабар курдук толкуйдуохха сөп. Тыа сирин дьоно туһаныа этилэр.
Ааптар: Вера Петрова