Ыһыах — саха норуотун биир сүдү, тымныы кыһыны этэҥҥэ туораабыппытын туоһулуур, Айыыларбытын кытта чугасыһар, кинилэртэн байылыат олоҕу көрдөһөр, саха аһын аһыыр, төрүт оонньууларын оонньуур бырааһынньыкпыт. Бэс ыйын 21 күнүн, күн уһуур күнүгэр, ыһыах күнэ диэн ааттыыбыт.
Ыһыах түһүлгэтин арыйыы алгыс этиититтэн, үөһээ айыылартан көрдөһүүттэн-ааттаһыыттан саҕаланар. Ол сиэрэ-туома бэйэтэ бэрээдэктээх, ыытыллар тиһиктээх. Ол курдук, күн көрсүүтэ, уот иччитигэр сүгүрүйүү сиэрэ-туома, Дьөһөгөй Айыыга сүгүрүйүү, кымыс иһиитэ — бу барыта ыһыах сүрүн санаатын илдьэ сылдьар өйдөбүллэрбит буолаллар. Алгыс этиитэ, кымыс иһиитэ суох ыһыах буолбат.
Быйылгы Туймаада хочотун Ыһыаҕа бэс ыйын 28-29 күннэригэр Үс Хатыҥ сиригэр-уотугар ыытыллаары улахан бэлэмнэнии бара турар. Сылтан сыл аайы ыһыах түһүлгэлэрэ улаатан, киэркэйэн, төрүт Дыгын оонньуулара сайдан, сиэр-туом кэҥээн, ыытыллар тэрээһиннэр элбээн, соҕотох сүдү бырааһынньыкпыт элбэх дьону муһарын көрөргө олус хайҕабыллаах. Ол туһугар Дьокуускай куорат дьаһалтата уонна олохтоох спонсордар күүскэ үлэлииллэр. Туймаада ыһыаҕар бу сыллар тухары элбэх Гиннес рекордара туруоруллубуттара: 2012 сыллаахха 15.293 киһилээх оһуохай «Самый большой круговой танец-осуохай в мире» ааты сүкпүтэ, 2014 сыллаахха алгыс сиэригэр-туомугар 11.136 киһи тоҕуоруһан турбутун, 2017 сыллаахха сахалыы таҥастаах киһи ахсаана 16.626 диэри тиийбитин рекордунан аахпыттара.
Быйылгы Туймаада Ыһыаҕын саҥа уонна сонун тэрээһининэн «Туймаада Куо-2025» буолара күүтүллэр. Бу урукку, өр сылларга умнулла сылдьыбыт, кэрэ буолуу күрэҕин сөргүтүү, саҥа тыыннааһын буолар. Хас эмэ кыыстан 20-чэ эрэ кыыс сүүмэрдэнэн талыллан сүрүн бириис иһин күрэхтэһиэхтэрэ, биир кыыс «Туймаада Куо» аатын сүгүөҕэ. Бу Дьокуускай куорат олохтоох дьаһалтата уонна «Три кита» креативнай агенство холбоһуктаах улахан бырайыактара буолар. Бэс ыйын 11 күнүттэн 20 күнүгэр диэри сайаапкалары хомуйуу, онтон бүгүн, бэс ыйын 20 күнүгэр, салгыы кыттар 20 кыргыттар ааттара биллиэҕэ. Ол кэннэ, дьэ, бэс ыйын 28 күнүгэр Үс Хатыҥ туонатыгар киэһэ 21 чааска түмүктүүр түһүмэх буолуоҕа.
Үрүҥ Тунах Ыһыахтарынан!
keskil14.ru