Кэскил” хаһыат историятыгар туйгуннары сырдатар, билиһиннэрэр “Володя Ульянов дневнигэ” бэлиэ суолу-ииһи ылар. “Бэлэм буол” уонна “Володя Ульянов дневнигэ”—быстыспат ситимнээхтэр.
В.И.Ленин 100 сылын туолуутунан туһанан, оҕолору көҕүлүүр тугу тобулуох баҕайыный?”—диэн толкуйдаан-толкуйдаан, ”Володя Ульянов дневнигин”—арыйыахха диэн этии киллэрбитим. Николай Егорович итини олус да сөбүлээбитэ, хойукка диэри хайгыыр буолара, “Союз үрдүнэн ким даҕаны төбөтүгэр кэлбэтэх суол”,—диирэ”. Бу—биһиги хаһыаппыт Бочуоттаах редактора Нина Иннокентьевна Протопопова “Амма Аччыгыйа—“Бэлэм буолга” диэн ахтыытыгар суруйбут тыллара.
Хаһыат оччотооҕу ааҕааччылара, геройдара бу дневниги олус үчүгэйдик, сылаастык ахталлар.
Хаһыат үтүө историятын сөргүтэн, 2003 сыл муус устар 22 күнүгэр, “Кэскил” хаһыакка республика туйгун үөрэнээччилэрин түмэр “Муся Гаврилова Галереята”, “Володя Ларионов Галереята” диэн үчүгэйкээн рубрика үлэтин саҕалаабыта.
Саха норуотун киэн туттар чулуу академиктара Мария Кузьминична Гаврилова, Владимир Петрович Ларионов Галереяларыгар эргиччи “5” сыанаҕа үөрэнэр үөрэнээччилэр оскуола педкэлэктиибин мэктиэтинэн киирэр бырааптаахтара. Галереяҕа киирбит хас биирдии туйгун үөрэнээччигэ ону туоһулуур сибидиэтэлистибэ туттарыллара.
Галереяҕа үөрэх туйгуннара киирэр бырааптаахтар. Педагогическай сүбэ уурааҕынан, таабыл туоһулаах, мэктиэ суруктаах хаартыскалаах докумуоҥҥутун, итиэннэ “Кэскил”, эбэтэр, “Юность Севера” хаһыаттарга суруйтарбыт квитанцияҕыт куопуйатын 4sakral@mail.ru почтаҕа ыытыҥ.
Санатабыт, Галереяҕа V кылаастан саҕалаан—XI кылааска диэри үөрэнээччилэр киирэллэр.
Ааптар: Жанна Леонтьева.