Ыам ыйын 9 күнэ — Кыайыы күнэ. Таркаайы нэһилиэгэр сарсыардаттан оҕо-аймах, аҕам саастаах дьон уонна тэрилтэ үлэһиттэрэ бары Кыайыы параадыгар туруннубут. Халлааммыт тыаллаах, ардахтаах да буоллар, бу күнү бары долгуйа үөрэн туран өрө күүрээннээхтик көрүстүбүт.
Кыайыы күнүгэр биһиги сэрии кыттыылаахтарын, бэтэрээннэрин, сэрии кэмин оҕолорун саныыбыт уонна чиэстиибит. Параады иилээн-саҕалаан ыытта А.А. Моргусов аатынан «Талба» култууратын дьиэтэ, параадка хаамтылар нэһилиэк дьаһалтата, оскуола делегацията, МЧС, амбулатория үлэһиттэрэ. Параады үс араас дьүһүннээх шаардар киэргэттилэр, бу үбүлүөйдээх Кыайыы гербэтин өҥнөрө. Нэһилиэк аҕам саастаах олохтоохторо, үөрэнээччилэр, төрөппүттэр эһээлэрин, эбээлэрин мэтириэттэрин тутан «Бессмертный полк» акцияҕа кытыннылар.
Онтон оскуолабыт аттыгар Кыайыы скверыгар миитиҥҥэ муһуннубут. Хомойуох иһин, сэрии бэтэрээннэрэ билигин биһиги аттыбытыгар суохтар, сэрии кэмин оҕолоруттан Таркаайы бочуоттаах олохтооҕо Иван Николаевич Иннокентьев эҕэрдэ тыл эттэ, тэрилтэ салайааччылара пааматынньыкка күөх венок уурдулар. «Таркаайы нэһилиэгэ» МТ баһылыга Михаил Михайлович Гаврильев Кыайыы күнүнэн эҕэрдэлээтэ. Үөрүүлээх миитин кэннэ эҕэрдэ кэнсиэргэ сырыттыбыт, үөрэнээччилэр строевой хаамыы көрдөрдүбүт.
Аҕа дойду Улуу сэриитигэр Таркаайыттан 142 эр дьон ыҥырыллыбыта, онтон 48 эрэ киһи дьиэтигэр эргиллэн кэлбитэ. Биһиги нэһилиэкпит сэрии кэминээҕи историятын оскуолаттан, дьоммутуттан билэммит кэлэр ыччакка тиэрдиэхпит, сырдык өйдөбүл хааларын салҕыахпыт.
Валя НИКОЛАЕВА, 8 кылаас үөрэнээччитэ,
«Уткин сонуннара» медиакиин юнкора, Марха орто оскуолата, Ньурба.
keskil14.ru