Ахсынньы 19 күнүнээҕи Ил Дархан Айсен Сергеевич Николаев Анал этиитин бары долгуйа көрдүбүт. Ааһан эрэр сыл үтүө түмүктээх үлэлэрин, бырайыактарын туһунан киэн тутта иһиттибит уонна кэлэр 2025 сыл саҥа саҕахтары арыйар былааннарын кытта билистибит.
Ол туһунан бүгүн биһиэхэ Павел Васильевич Васильев, В.П. Ларионов аатынан Майа орто оскуолатын дириэктэрэ, Ил Дархан этиитин тула санаатын сырдатта:
Бэйэбит эйгэбитигэр, үөрэхтээһиҥҥэ, сыһыаннааҕы ылан эттэххэ, кэлэр үөрэх дьылыттан мэдиссиинискэй үлэһит, ол эбэтэр фельдшер оскуолаларга баар буоларын үөрэ иһиттим. Инникитин ыччаты патриотическай иитиигэ улахан болҕомто ууруллуоҕа диэн эттэ. Ол курдук, улуус баһылыктарын патриотическай иитиигэ солбуйааччылар баар буолуохтара. Ону таһынан, улууспут иһин ылан эттэххэ, Сыымах бөһүөлэгэр гаас утаҕа киириэҕэ диэн тоһоҕолоон эттэ. Өрүс нөҥүө олорор дьон биир тыын боппуруоһа муоста тутуута буолар. Бу сайыҥҥыттан муоста тутуута саҕаламмытын үөрэ иһиттибит. Бары муостабыт тутулларын эрэнэ күүтэбит.
Дириэктэрбит санааларын сиһилии бу сигэнэн көрөргүтүгэр ыҥырабыт:
https://vk.com/wall-211356349_4460
2025 сыл Аҕа дойду көмүскээччилэрин сылынан биллэрилиннэ. Ол аата Улуу Кыайыы 80 сылыгар аналлаах тэрээһиннэргэ, ытык кырдьаҕас бэтэрээннэрбитигэр, анал байыаннай дьайыыга сылдьар байыастарбытыгар улахан болҕомто ууруллуоҕа. Онон биһиги оскуолабыт эмиэ ол туһугар элбэҕи үлэлиэҕэ.
Сандаара СКРЯБИНА, «Мэҥэбил» пресс-киин юнкора, X кылаас,
Майа, Мэҥэ Хаҥалас.