Мин остуол тенниһинэн III кылаастан саҕалаан дьарыктаммытым. Онтон ыла күн бүгүнүгэр диэри сөбүлээн дьарыктанабын. Биһигини энтузиаст-тренер Михаил Дмитриевич Никифоров эрчийэр. Кини эрчийбит оҕолоро өрөспүүбүлүкэ араас таһымнаах күрэхтэригэр чөмпүйүөн, призер буолаллар. Билигин киниэхэ эрчиллэр оҕолор Ньурба оройуонун сүүмэрдэммит хамаандатыгар киирэн, оройуоммут чиэһин көмүскүүбүт.
2018-2021 сс. оскуола иһинэн тэриллибит «Көмүс ракетка» диэн сайыҥҥы лааҕырга сылдьан, остуол тенниһин албастарыгар, кистэлэҥнэригэр үөрэммиппит. Оскуолабытыгар, нэһилиэкпитигэр төһө да спортсаалабыт суоҕун үрдүнэн быыс-хайаҕас булан, спорт араас көрүҥнэринэн дьарыктанабыт. Бэйэм да спорт араас көрүҥнэринэн үлүһүйэбин. Ол курдук, атах оонньуутугар дьарыктанабын, хайыһардыыбын, волейболлуубун, баскетболлуубун. Волейболга, баскетболга чугас сытар нэһилиэктэргэ тахсан оонньоон, эрчиллэн киирэбит. Ол эрээри, остуол тенниһинэн утумнаахтык дьарыктанабын.

Остуол тенниһинэн дьарыктаныым миэхэ аан дойдуну арыйда диэн киэн тутта кэпсиэхпин сөп. Ол курдук, 2022 с. дойдубут тэбэр сүрэҕэр Москуба куоракка сайыҥҥы сынньалаҥмытыгар Чуукаартан 4 оҕо буолан үөрэтэр- дьарыктыыр хомуурга баран кэлбиппит. 2023 с. сайыныгар Бурятия киин куоратыгар Улан-Удэҕэ Чуукаартан 6 оҕо, ааспыт сайын 2024 с. кыраныысса таһыгар Кытай Харбин куоратыгар Чуукаартан 7 оҕо буолан, үс нэдиэлэ үөрэнэн, эрчиллэн кэлбиппит. Бу маннык сырыылар биһиэхэ араас омук дьонун кытта алтыһарга, саҥа сири-дойдуну көрөргө, үгүһү билэргэ үөрүйэхтэнэрбитигэр көмөлөһөр дии саныыбын. Араас таһымнаах күрэхтэргэ кыттан, элбэх доҕордоннум.



Саҥа үүммүт 2025 сылы сэмэй ситиһиилэрдээх көрүстүм. Ол курдук, тохсунньу 3-4 күннэригэр Аммаҕа ыытыллыбыт өрөспүүбүлүкэтээҕи турнирга 14 -17 диэри саастаах кыргыттарга III миэстэ буоллум. Онтон тохсунньу 6 -7 күннэригэр Дьокуускай куоракка ороһооспотооҕу «Хаар» турнирыгар иккис лигаҕа киирсэн, I миэстэни ыллым. Онтон салгыы тохсунньу 11 – 12 күннэригэр юрист, үлэ, спорт бэтэрээнэ, «Уус-Алдан улууһун социальнай экэнэмиичэскэй сайдыытыгар кылаатын иһин» бэлиэ хаһаайына, «Азия оҕолоро», Уһук Илин уонна Россия таһымнаах күрэхтэһиилэр, I категориялаах остуол тенниһин судьуйата Владимир Семенович Леонтьев кэриэһигэр ыытыллыбыт оҕолорго өрөспүүбүлүкэтээҕи турнирга кытынным. Уонна Леонтьевтар дьиэ кэргэттэриттэн «Саамай ыраах сиртэн кэлбит күрэхтэһээччи» диэн биһирэбил бириискэ тиксэн, улахан махталбын тириэрдэбин. Маннык оҕолорго аналлаах өрөспүүбүлүкэтээҕи турнирдартан оҕолор үрдүк чыпчаалга тахсалларыгар баҕарабын. Бу күрэхтэһии үһүс сылын ыытылынна уонна сыл аайы ыытыллар буолбутун үөрэ иһиттим. Онон кыһыҥҥы сынньалаҥмын туһалаахтык атаардым.
Мин спорду өрө тутарбар төрөппүттэрим төһүү күүс буолаллар. Кинилэр миигин өйүүр буоланнар барытыгар ситиһиилээхпин дии саныыбын уонна муҥура суох махтанабын. Спордунан дьарыктаныҥ, чэгиэн туруктаах буолуҥ диэн баҕа санаабын этэбин.
Дария Данилова, Х кылаас үөрэнээччитэ,
Өлөксөй Һүөдэрэбис Өлөксүөйэп аатынан Чуукаар орто оскуолата,
Ньурба улууһа.
keskil14.ru