Хас биирдии киһиэхэ ийэтэ, аҕата, эһэтэ, эбэтэ, хос эбэлэрэ, хос эһэлэрэ биир дьиэ кэргэн эйгэтин, холумтанын олохтууллар. Мин түөрт хос эһэлэрбиттэн үһэ Аҕа дойду Улуу сэриитин кыттыылаахтар. Сэрии толоонуттан үһүөн тыыннаах эргиллибиттэрэ.
Мин эһиэхэ ийэбинэн хос эһэм Илья Петрович Владимиров туһунан кэпсиэхпин баҕарабын. Кини атырдьах ыйын 10 күнүгэр 1922 сыллаахха Мэҥэ Хаҥалас Дьаҥхаада (Төхтүр) нэһилиэгэр Петр Спиридонович Владимиров уонна Ирина Петровна Березкина дьиэ кэргэттэригэр күн сирин көрбүтэ. 20-чэ сааһыгар сэриигэ ыҥырыллан барбыта. Улуу Кыайыыны 1945 сыллаахха Берлиҥҥэ тиийэ уһансан, дойдутугар төннүбүтэ.
1948 сыллаахха Ньурбаттан төрүттээх хос эбэбин Федора Семеновна Владимированы (Васильева) кытта сүрэхтэрин холбоон, Дьокуускай куоракка ыал буолбуттара. 1949 сыл бэс ыйын 30 күнүгэр мин эбэм Тамара Ильинична Владимирова төрөөбүтэ. Ол кэмҥэ эһэм Томпоҕо киномеханигынан үлэлиирэ. Эбэм онно күн сирин көрбүтэ.
Дьылҕа хаан ыйааҕынан, эбэм баара-суоҕа үс саастааҕар хос эбэлээх эһэм суоллара тус-туспа арахсыбыт. Эбэбин кытта хос эбэм Федора Семеновна дойдутугар Ньурбаҕа барбыта. Онтон эһэм 50-с сылларга хоту Тиксиигэ үлэлии барбыта. Аймахтарыгар 1962 сылларга диэри биллэрэ эбитэ үһү. Бүтэһик ыыппыт хаартыскатыгар Депутатскай бириискэтигэр сылдьан түспүтүн ыыппыта баар. Ол кэнниттэн кини туһунан туох да сурах иһиллибэтэх.
Эбэм ийэтэ кэпсииринэн, хос эһэм төрүкү лидер хааннаах, олус чэнчис, куруук гимнастеркатын кэтэрэ, атаҕын таҥаһа өрүү килэбэчийэ сылдьара эбитэ үһү. Сэриигэ артиллерия гвардиятын сержана буолбут. Кыһыл Знамя орденынан, “За отвагу”, “За взятии Берлина” мэтээллэринэн наҕараадаламмыт. Ону таһынан дэгиттэр талааннаах буолан, ньиэмэс тылыгар тылбаасчытынан сылдьыбыт. Хомойуох иһин, эрдэ сураҕа суох сүппүт буолан, кини олоҕун туһунан элбэҕи билбэппит. Эбэм Тамара Ильинична соҕотох төрөппүт кыыһа буолан, 75 сааһыгар диэри аҕатын туһунан сурах көрдүүр да улаханы булбата.
Дьиктитэ диэн таайым, ийэм бииргэ төрөөбүт убайа, оруобуна хос эһэм төрөөбүт күнүгэр күн сирин көрбүт. Билигин кини анал байыаннай дьайыы кыттыылааҕа, дойдутун туһугар туруулаһа сылдьар.
Түгэнинэн туһанан, баҕар бу ыстатыйаны аахпыт хос эһэм туһунан тугу эмит билэр дьон биллэргитигэр көрдөһөбүн. Сибээстэһэр нүөмэргит: 89142641443.
Валера НЕУСТРОЕВ, VI кылаас,
В.М.Новиков-Күннүк Уурастыырап аатынан Эмис орто оскуолата, Амма