Дүллүкүгэ Аҕа дойдуну көмүскүүр Улуу сэрии кыайыыны бэлиэтиир тэрээһин ыам ыйын 8 күнүттэн саҕаланна.
Сарсыардаттан саҕалаан сэрии тыйыс сылларыгар күргүөмнээхтик үлэлээн кыайыыны чугаһатыспыт тыыл бэтэрээннэрин Николай Руфович Руфовы, Мария Ивановна Алексееваны, Мария Федотовна Иванованы уонна сэрии сылын оҕолорун, Анал байыаннай дьайыы бэтэрээнин Василий Иванович Переваловы өрөгөйдөөх бырааһынньыгынан Дүллүкү нэһилиэгин баһылыга Романов Николай Петрович уонна олохтоох дьаһалта,
култуура, сынньалаҥ киинин үлэһиттэрэ дьиэлэригэр тиийэн эҕэрдэлээтилэр. Үөрүүлээх, долгутуулаах быһыыга СӨ Ил Дархана Айсен Сергеевич Николаев анаабыт үбүлүөйдээх мэтээлин уонна «Үөһээ Бүлүү улууһа» МО баһылыга Валерий Валерьевич Николаев «Бочуоттаах бэтэрээн» бэлиэлэрин туттардылар. Ытык дьоммутугар чэгиэн-чэбдик туругу, этэҥҥэ буолууну баҕардылар.
Киэһэ 10 чаастан олохтоохтор мустан, «Өйдөбүнньүк чүмэчи» аахсыйаҕа кытыннылар. Хас биирдии оҕо, улахан дьон сэрии толоонуттан эргиллибэтэх, эйэлээх олох иһин тыыннарын толук уурбут уонна уоттаах сэриигэ саа-саадах тутан Ийэ дойдуларын көмүскээбит чулуу дьоммутун санаан, сүгүрүйэн туран «Өйдүүбүт!» диэн суругунан махталларын биллэрдилэр.
Ыам ыйын 9 күнүгэр сарсыарда 11 чаастан Дьоҕус паркаҕа Улуу Кыайыы 80 сылыгар аналлаах өрөгөйдөөх парад саҕаланна. Оскуола оҕолоро, улахан дьон «Арыылаах» муостатыттан сэлэлии хааман бырааһынньыктыы киэргэммит паркаҕа муһуннулар.
Кинилэр кэннилэриттэн 9 — 11 кылаас курсаннара уонна 8 кылаас кадеттара парадтаан киирдилэр. Кинилэр Аҕа дойду Улуу сэриитин кыттыылаахтарыгар туруоруллубут «Ким да умнуллубат, туох да умнуллубат!» пааматынньыкка өлбөөдүйбэт махтал бэлиэтин венок уурдулар.
Нэһилиэкпит аҕа баһылыга Н.П.Романов тыыл бэтэрээннэригэр, сэрии оҕолоругар, мустубут дьоҥҥо анаан эҕэрдэтин эттэ. Кини бу үйэлэргэ умнуллубат Улуу Кыайыы суолтата сылтан сыл күүһүрэн, дириҥээн иһэрин бэлиэтээтэ. Кэлэр көлүөнэ Кыайыыны уһансыбыт ытык дьоммутун умнубатыгар, өрүү өйдүү-саныы, сүгүрүйэ туралларыгар ыҥырда.
Кыайыы парадыгар мустубут биир дойдулаахтарын Анал байыаннай дьайыыттан кэлэ сылдьар Дмитрий Руфов эҕэрдэлээтэ: «Дорооболоруҥ, күндү биир дойдулаахтарым! Улуу Кыайыы үбүлүөйдээх 80 сылынан итиитик-истиҥник эҕэрдэлиибин! Барыгытыгар өрүү күөх халлааны, доруобуйаны, дьолу-соргуну баҕарабын!», — диэн истиҥ баҕа санаатын тириэртэ. Олохтоохтор дойдубут көмүскэлигэр сылдьар хорсун буойуммутун дохсун ытыс тыаһынан өрө көтөҕүллүүлээхтик көрүстүлэр.
Өрөгөйдөөх парад кэнниттэн «Саллаат кухнята» үлэлээн, дьон саллаат паегун: гречка хааһыны, хара килиэби, хара чэйи амсайдылар.
Өрөгөйдөөх Кыайыы күнүнэн өйдөбүнньүк хаартыскаҕа түһэн, ааспыты ахтан, сэһэргэһии салҕанан барда.
Биһиги бүгүҥҥү көҥүл, иллээх-эйэлээх олоххо олорорбут туһугар , сир үрдүгэр фашизм суох буоларын туһугар биир сомоҕо буолан турууласпыт дьоммутун, история кэрдиис кэмин умнубат эбээһинэстээхпит.
Аҕа дойдубутун чиэстээхтик көмүскээбит чулуу дьоммутугар махтанабыт, сүгүрүйэбит! Ким да умнуллубат, туох да умнуллубат!
Айыына Петрова, 8 кылаас, Сааскыйа Васильева, 9 кылаас, "Эрчим" медиакиин, Дүллүкү, Үөһээ Бүлүү