Дьокуускай куорат кииннэммит бибилэтиэкэлэрин ситимэ араас оройуоннарынан 18 бибилэтиэкэ-филиаллардаах. Куорат киинигэр турар А.П. Гайдар аатынан дьиэ кэргэн ааҕар бибилэтиэкэтэ элбэх ааҕааччылаах, араас хайысханан үлэлиир.
Ол курдук, манна аатырбыт суруйааччы биир бөдөҥ айымньытын аатынан «Чук и Гек» библиотеатр үлэлээбитэ иккис сылыгар барда. Маннык үлэ хайысхата кэнники кэмҥэ бибилэтиэкэлэргэ элбэхтик баар буолла, үлэни салайар эдэр эрчимнээх үлэһит Илья Ильич Неустроев. Библиотеатр иһинэн 12 оҕо сыанаҕа тутта-хапта сылдьарга, тиэкиһи өйдүүргэ үөрэнэллэр, артыыс буолар үөрүйэхтэргэ уһуллаллар, араас суруйааччылар айымньыларын ааҕаллар.
Саҥа дьыллааҕы бырааһынньыкка библиотеатр оҕолоро «Саҥа дьыллааҕы сүпсүлгэн» диэн тэттик туруорууну көрдөрбүттэрэ, ис хоһоонунан кыыс оҕо кинигэни ааҕарын сөбүлээбэт эбит, биирдэ кинигэ ааҕан баран түүлүгэр айымньылар геройдарын кытта көрсүһэр уонна геройдары билбэт буолан көмөлөһөр кыаҕа суоҕуттан хомойор. Онно кини элбэх кинигэни аахпытым эбитэ буоллар барытын билиэм этэ диэн саныыр. Утуйан туран баран үчүгэй түүлү көрбүтүн санаан кинигэни ааҕар туһалааҕын өйдүүр.


Күндү ааҕааччыларбытын кинигэни кытта доҕордоһоллоругар ыҥырабыт, элбэҕи билин-көрүҥ, кэрэҕэ-сырдыкка тардыһыҥ!
А.П. Гайдар аатынан бибилэтиэкэ библиограба Фекла Варламова.
Дьокуускай к.
keskil14.ru