Саха Өрөспүүбүлүкэтин үөрэнээччилэрин «Спортивные якутяне» сайыҥҥы спартакиадаларын чэрчитинэн спортивнай ориентированиеҕа икки күннээх күрэхтэһии Владимировка, Табаҕа мырааннарын быыстарынан буолан ааста. Таатта улууһун чиэһин 12 оҕолооох хамаанда көмүскээтэ.
Хамаанда чиэһин көмүскээтилэр — Тааттатааҕы лицей үөрэнээччилэрэ Коля Никонов, Стас Моттуев, Алеша Ефимов, Айыллаана Большакова, Аэлита Лягушина, Настя Захарова, Аэлита Петрова, Валерия Тарасова, Ытык-Күөл 2 нүөмэрдээх үөрэнээччилэрэ Данил Белолюбскай, Коля Иванов, Толя Кычкин, Алина Аввакумова. Хамаанданы Тааттатааҕы оҕо айымньытын «Сатабыл» дьиэтин туризмы уонна кыраайы үөрэтэр куруһуок салайааччыта Октислава Владиславовнана Аргунова бэлэмнээн, кытыннаран кэллэ. Иккис салайааччынан 2 №-дээх Ытык Күөл орто оскуолатын учуутала, кылаас салайааччыта Ульяна Ивановна Тарасова сырытта. Маннык оскуола учууталлара бииргэ үлэлэһэллэрэ олус хайҕаллаах уонна оҕолор эппиэтинэстэрэ даҕаны үрдүүр.
Хамаанда оҕолоро сүрдээх тыҥааһыннаах күрэхтэргэ тулуурдарын, сымсаларын, толкуйдаахтарын, сатабыллаахтарын көрдөрдүлэр. Үрдүк мырааннары дабайан, мэһэйдээх сирдэри туораан, каартаҕа ыйыллыбыт “контрольнай пуннары” көрдөөн, бириэмэҕэ сүүрэн-көтөн, толкуйдаан, сыралаһан өрөспүүбүлүкэҕэ 3-с миэстэлээх призер буолан ситиһии өрөгөйүн туттулар. Салайааччы Октислава Владиславовнана оҕолорун сэргэ анал маршрутунан сүүрэн ситиһиилээхтик кытынна. Күрэхтэһии түмүгүнэн МЖ-14 бөлөххө үһүс бириистээх миэстэ иһин Кубок уонна диплом туттарылынна.
Саха оҕолоро өбүгэлэрин утумнаан буулдьанан ытыы успуорт көрүҥүн сөбүлээн дьарыктаналлар. Бу көрүҥ биһиги улууспутугар өссө сайдан, ситэн иһиэ диэн эрэнэбит. Бу көрүҥҥэ уопсайа 80 кыттааччы 21 улуустан кэлэн кыттыыны ыллылар. Бэс ыйын 6-7 күннэригэр СК «Дохсун» уонна ДЮСШ-4 площадкаларыгар буулдьанан ытыы күрэҕэ буолбута. Тыараһа орто оскуолатын үөрэнээччилэрэ Стас Сунхалыров, Лилиана Егасова ВП60 көрүҥҥэ, Андрей Тюнгюрядов, Анжелина Аргунова ЫКСОШ-1 үөрэнээччилэрэ ПП-60 көрүҥҥэ Таатта улууһун аатыттан кытыннылар. Тренердэр Октислава Владиславовна Аргунова, Гаврил Сергеевич Огонеров оҕолорго сүбэ-ама биэрдилэр. Уопсай түмүккэ хамаанда бэйэтин бөлөҕөр 6 миэстэҕэ таҕыста.
Күрэхтэргэ кыттыбыт спортсмен оҕолор үрдүк таһымнаах күрэхтэргэ ситиһиилээхтик кыттан, «Туймаада» стадиоҥҥа спартакиада аһыллыытын үөрүүлээх церемониятыгар сылдьан олус астыммыттара, дуоһуйбуттара, маннык улахан тэрээһиҥҥэ кыттыыны ылан сүргэлэрэ көтөҕүллэн, үгүс доҕоттордонон, күрэхтэртэн баай билиини-сатабылы иҥэринэн, инникитин да спордунан дьарыктанарга күүс ыллылар.
Бу күрэхтэргэ кыттарбытыгар, тэрээһиммитигэр көмөлөспүт, сүбэ-саргы буолбут үтүө-мааны дьоммутугар, чуолаан Тааттатааҕы үөрэх салаатын салайааччытыгар Кривошапкин Владимир Владимировичка, үөрэх салаатын спорт эйгэтин сүрүннүүр специалиһыгар Константин Афанасьевич Ширяевка, ДЮСШ директорыгар Ньургун Семенович Дягилевка, ыраах айаҥҥа эрэллээхтик илдьэ сылдьыбыт суоппарбытыгар Тарасов Сергей Константиновичка, бородууктанан көмөлөспүт Тааттатааҕы лицей директорыгар Сивцева Изабелла Александровнаҕа, Ытык Күөл 2 нүөмэрдээх орто оскуолатын директорыгар Дмитрий Вячеславович Сергеевка, улахан күүс-көмө буолбут төрөппүппүтүгэр Иванов Петр Николаевичка улахан махталбытын тиэрдэбит.
Маннык сонун күрэххэ улуус чиэһин көмүскээбит, кэскиллээх, инникигэ эрэллээх оҕолорбутун, өрөспүүбүлүкэ призердарын улууспут дьаһалтатыгар ыҥыран чиэстээтилэр, эҕэрдэлээтилэр, үгүс үтүө тыллар, баҕа санаалар этилиннилэр. Биһиги оҕолорбут маннык үөрүүлээх түгэҥҥэ ыҥырыылаах ыалдьыт буоланнар чиэстэммиттэриттэн олус астыннылар.
Улуустарынан киэн туттуулара, дойдуларыгар тапталлара, дойдуга бэриниилээх буолуу санаалара күүстэригэр күүс эптэҕэ, үрдүк ситиһиигэ тардыһыылара эбилиннэҕэ. Махтал буоллун оҕолорбутугар!
«Сатабыл» медиа студията, Тааттатааҕы «Сатабыл» оҕо айымньытын дьиэтэ.