Тааттатааҕы «Сатабыл» оҕо айымньытын дьиэтин иһинэн сылын аайы оскуола саастаах оҕолорго аналлаах сайыҥҥы айар мастерскойдар үлэлииллэрэ үтүө үгэскэ кубулуйда. Быйыл сайыҥҥы сынньалаҥ бэс ыйын 1 күнүттэн 20-гэр диэри үлэтин тэрийэн ыытта. Уопсайа 160 оҕо таптыыр көрүҥнэринэн талан эн-мин дэһэн, үөрэ-көтө, астына сайыҥҥы мастерскойдарбытыгар дьарыктаннылар.
Сайыҥҥы мастерскойдар үөрэтэр бырагырааммалара хас биирдии оҕону сайыннарар, саҥа, сонун көрүҥнэргэ үөрэтэр сыаллаах буоллулар. Онон оҕолор саҥа сатабылларга үөрэнэр баҕаттан эрдэттэн миэстэ ылан олус эппиэтинэстээхтик дьарыктаннылар. Үөрэх таһынан педагогтар оҕолор киһи быһыытынан сайдыыларыгар туһаайаан араас тэрээһиннэри ыыттылар. Ону таһынан дьарыктар икки ардыларыгар оҕолор сынньалаҥнарын эмиэ интэриэһинэйдик тэрийэн көрдөөх-нардаах оонньуулары ыытан оҕолор үөрэн-көтөн бу сайыҥҥы сынньалаҥнарын туһалаахтык атаардылар.
Бу сылга сэттэ араас мастерской үлэлээтэ, ол курдук: «Познаю свой край», «Школа актива», «Управление дроном», «Степ аэробика», «Айар Эйгэ», «Мир украшений» уонна «Дизайн Интенсив».
Мастерскойдарбыт үлэлэрин түмүктүүр күммүтүгэр үөрэх бырагыраамматын хайдах ситиспиттэрин, туохха үөрэммиттэрин, сатабылларын отчуоттуур аһаҕас күн буолла. Оҕолор бэйэлэрин үлэлэрин төрөппүттэргэ көрдөрөн, кэпсээн, сатабылларын отчуоттаан, кэнсиэр, быыстапка туруоран, ыллаан, үҥкүүлээн олус сэргэх, туһалаах күнү бэлэхтээтилэр.
Айар мастерскойдар сайыҥҥы кэмҥэ оҕо дьарыктаах буоларыгар, оҕо социальнай эйгэҕэ тирэхтээхтик киирэригэр, элбэх саҥа доҕоттору булунан олоххо холкутук үктэнэллэригэр күүс-көмө буолар аналлаахтар.
Оҕолорбут сайыҥҥы сынньалаҥ күннэрин үөрүүлээхтик, туһалаахтык атааралларыттан олуһун диэн үөрэбит, астынабыт.
Партнердарбытыгар, төрөппүттэрбитигэр, баһаатайдарбытыгар, педагогтарбытыгар улахан махталбытын этэбит, кэскилбит, кэнчээри ыччаппыт – оҕолорбут сайдалларыгар күүс-көмө буолан таһаарыылаах үлэбит үтүө түмүктээх буоллун, үгүс оҕону тарда турдун.
«Сатабыл» медиа студията, Тааттатааҕы «Сатабыл» оҕо айымньытын дьиэтэ.
keskil14.ru